Kiwa khih mooyong ka West Khasi Hills da pynsñiaw ki yei sñiawkmen wa daw sdang noh ka lynnong wa thymme i tih mooyong hapoh ka jylla Meghalaya hadien wa ka Ministry of Coal ha ka 6 tarik uni u bnai da mynjur ko ya ki 5 tylli ki Coal Mining Application yow sdang khih mooyong hapoh ka jylla.
Kam wow pynkynmoo wa ka Supreme Court da dep pynmih hukum ko wa i tih mooyong hapoh ka jylla u chah deiwa bood ya ki aiñ tih marpohkhyndaw ka ri hadien wa ka NGT ha u 2014 da khang ko yei tih mooyong dei rukom wa tip kam i Rat Hole Mining.
Ka Ministry of Coal kattæ da e ko ya ka License cha u Shainingstar Khardewsaw, Marbiangbor Nongsiej, Erantis Sympli wa u Sajay Laloo ha West Khasi Hills wa u Teilang Pde ha Southwest Khasi Hills District yow sdang ki wow leh ya ka sorjamin namo ka Survey yow tip hadooh katwon em mooyong dep te yow pynkhreh ki yaka Mining Plan.
Daw emkaam leh wow yoh ki ya ka Environmental Clearance naka sorkar pyrdi lynbga ka Ministry of Environment, Forest & Climate Change chwa wow yoh ki ya ka Mining Lease na ka Ministry of Coal.
Kiwa khih mooyong u S. Khardesaw wa u M. Nongsiej da e yaroh ki leh ya ka sorkar MDA wa chimkhia ko wow yasaaid hapoh ka yung bichaar Supreme Court deiwa yooluti wa manda kut ka khlam, i khih mooyong hapoh ka jylla u man noh ko katkam ka aiñ.
