Ka seiñ FKJGP Jaiñtia Hills Zone dap ko dei sñiawsih iwa khroo heiyatoh wa i khlaad syndet u dkhot yong ka seiñ na ka FKJGP-Thadlaskein Block Circle u (L) Balentine War.
Ka seiñ da ong ko wa i khlaad wa syndet yong o man ko i dooh nong wa khroo ya kiwa ha yung ha sem, ya ka seiñ FKJGP kamjooh ya ka jaitbru hi waroh kawi. Uni u dkhot man u uwi na ki dkhot wa pynyoo sakhiat yei sap yei phong wow e yumut ha ki kaam yong ka seiñ neibynta wow kynrong ya ka jaitbru yong i chakhmat.
Kamtæ ka seiñ ym yoh kyntien de ko wow ong deiwi tawan yei kaam wa bha yong u Balentine, sah sa du i kymmoo donhi, kamwa da lai u chakhmat u Blai Kynrad, u kyrkhu u leh ya ka seiñ yow yoh ko u nang ye chooh chooh u chakri deiwa bha ya ki paidbah wa ya ka yung ka sem.
Ka seiñ da phah ko leh ya ka khubor sñiawlem cha kiwa ha yung ha sem wa ki lok ki jor wow yoh ki yei pyntngen na u Blai wow syrpud syrpai yei sñiawsih joor yong ki khamtam kam ka yung ka sem.
