Sñiawngooh ka chnong Nongthymme yaka JSM wa MPUF yei yarap yong ki

Ka chnong Nongthymme kawa em ha East Jaiñtia Hills, lyngba kani ka kyrwoh wa da phah da u Pyrkhat Bareh uwa man leh u Secretary kani ka chnong wa u Precious Sympli uwa man kam u waheh chnong da ong ki neiliang ka chnong da pynsñiaw ko yei sñiawngooh hadooh kattæ kattæ yaka seiñ Jaiñtia Student Movement (JSM) kamjooh yaka seiñ Meghalaya People United Front (MPUF) da i mynsien wa sñiawkhia ka yong ki da smat ki wow e yarap da u khoo cha ki paidbah chong chnong hakini ki sngi wa dadep

Chooh chooh hakam ini i por ka sorkar da pynkrehkaam ko da i khang chnong ha waroh kawi ka ri India kam chibynta wow lait nei poor i kjut khlam COVID-19, neitæ i daw wym yoh laad de ki wow lai mylla sngi wa toh kini ki chnong kiwa im hei mylla sngi don hi.

Neiliang ka chnong da kitbok kit rwiang ko ya kini ki ar tylli ki seiñ krehmon sñiawbha deiwa kyrkhu kyrdoh nadooh uwa yahkhmat ka seiñ JSM u Leningatar Rymbai hadooh uwa yahkhmat ka seiñ MPUF u Michal Chyrmang kamjooh lang wa ya dkhot hi waroh, wow em ki hapyrdi i doh i pran iwa chait wa khiah wow ye chooh chooh ki wow yarap ya ki kup chilliang sem chilliang hakani ka jylla Meghalaya ka yong i.