Ka chnong Rachai, East Jaiñtia Hills da dap ko dei sñiawngooh wa khroo ya ka Ramakhrishna Mission (RKM), Sohra Ashram wa da wan ko chakhmat wow kyrchaan da ki marbaam ynnin ka sngi cha ki 45 tylli ki manyung kiwa emkaam yarap kiwa kynthup ya kiwa duna ha i doh i pran wa kiwa maad yei chitom kam ha kini ki por wa em ka khlam COVID-19.
Ini i wan yarap, da yahkhmat da u Manbha Lyngdoh ryngkat i emlang u Maharaj wa ki dkhot ka RKM ryngkat i synraan u Harvis Phawa (Ex-Waheh Chnong Jalyiah) wa u Joining Dkhar (Ex-Waheh Chnong Khliehmyntriang).
Ha kani ka sngi da em ka yalang wa tbian ya kawa da pynlai da u Romel Lyngdoh wa man kam u waheh chnong ka Rachai heiwa u Manbha Lyngdoh hawa e yei klam da dap u dei sñiawkmen wa da yoh u ya kani ka laad wow wan e yarap kyrpang ya ki manyung wa dooh wa duk deiwa khana leh wa i thmu yong ki toh wow e i chakri para bru neibhah wa dei leh ya ki kaam wa bha man i kam i chakri ya u Blai.
Da kyntu u leh ya waroh kat kiwa emlang ha kani ka sngi wow ngoohblai won wow lait na i chitom khamtam neibynta ka RKM wow em ko hapyrdi i yada u Blai Kynraad khnang wow ye chooh chooh ko u e yarap cha kiwa emkaam.
Neiliang u Romel Lyngdoh da pynkynmoo u wa ka RKM neipor cheipor wan e yarap ko ya ki paidbah ka chnong nadooh u snem wa dadep kam da ki that wei ha kani ka kynti leh da man kam i kyrkhu wa khroo ya ki manyung kiwa yoh yarap na ka ha kam kini ki por wa emkaam bha yei chaan kylliang para bru.
U Romel Lyngdoh da kitbok kitrwiang u leh wa u Blai u kyrkhu kyrdoh u ya ka RKM wa ki dkhot yong ka waroh kamjooh ya u Manbha Lyngdoh wow ye ki wow tia chaphrang wow e chakri ya ka imlang sahlang waroh kawi.
Ha kani ka sngi da e ya ki marbaam deiwa bood ryntih thij ya ki kyndon wa da booh ka sorkar wow yada nei poor ka khlam u COVID-19 deiwa jngai iwi na iwi wei wow sap ya ki Mask.
