Jowai: Ka Dorbar Chnong Nangbah haka khubor lyngba u Waheh Chnong u T. Iongwai da pynsñiaw ki yei sñiawngooh hadooh kattæ kattæ nadooh ki Volunteer kiwa man ki khon yong ka chnong kiwa da ya mih ryntih lang chirup ynne ka 3 tarik heiyatoh wa i jia wa sñiawsih hajrong i ngam um yong uwi u khon khynroo yong ka chnong uwa da ngam um haka 2 tarik uni u bnai ha ka wah Myntang.
Ka Dorbar Chnong waroh kawi da pynsñiaw ko leh yei e khublei wa kyrpang khamtam yaka SRT (Special Rescue Team) wa yaka FES (Fire and Emergency Service) wei kamjooh leh yaka Phramer Traffic Cell hapoh i yahkhmat u SI A.R. Marak wa ki bru yong oo kiwa da wan yarap yow sai ya i metyap ynne ka sngi ha i por kamwa 11 waje i step.
Sa chisien ka chnong waroh kawi da pynsñiaw ko yei sñiawkmen wa khroo wa mar ya phah ya kitai ki bor wa toh u pait, da chimkhia ki wei da man ko kawa jop heiwa da yoh wow pyndep ya ki kaam ki jaam waroh ynne ka sngi. Kam ka chnong da kitbok kitrwiang ko ya phi yow yoh phi yei nang i chait yow nang lai chakhmat ha ki kaam ki jaam waroh.
