Ynne ka sngi, ka Jaiñtia National Council (JNC) Western Zone, hapoh i yahkhmat u President, u Hamehi Bamon chirup wa ki kattu katni ngut ki dkhot yong ka da lai ki wow booddien biang ya chiboon ki mat kiwa ka seiñ da yaklam ko wa u DMHO yong ka West Jaiñtia Hills District ha u bnai wa dadep (08-10-2024) heiwa da booh leh dei thoh cha u DMHO ha katai ka sngi.
Ka seiñ dap ko dei sñiawngooh ya ka yung krehkaam u DMHO wa da chimkhia sakhiat ki heiyatoh wa i kaam i chait i khiah yong ki paidbah hadien wa da yaklam heiyatoh wa ka MCH Hospital, Jowai heiwa ka seiñ da yoh ko yei jubab wa da wan pait bniah ki wei da sñiaw yahaap ki wow pynchna wei wow pynboon ya ki palong neibytna kiwa kjut wa kiwa kha khon kamwa da booh hei thoh ka seiñ.
Ka seiñ da ong ko wa ini daw man ko i kyrkhu bah ya ki paidbah.
Heiyatoh wa ka Pdengshakap PHC da pyntip leh wa da pynkhreh noh ki wow pynchna da ka yung (Building) wa thymme ka wow man i kyrkhu ya ki paaid wa chong chnong yong ka thaaiñ War Jaiñtia.
Hajrong won wow booh bru yow yarap hei leh Post-Mortem ha Jowai Civil Hospital, Ialong, da yoh jubab wow thung bru noh ki kam kiwa yarap ya uwa leh Post-Mortem deiwa su ya ki da ka nong sngi.
Ka seiñ da yoh ko leh yei jubab na ka sorkar lyngba u DMHO wa katkam wa dadep dawa ka seiñ wow pynyoh ya ka Nursing Centre, ka sorkar da phah ko ya ki bru yong ka wow lai pait (Survey) yei thaw wow chna ya ka Nursing College chirup waka Nursing Examination Centre ha i thaw wa em ha Mukhla, West Jaiñtia Hills District.
Kamtæ ka seiñ dap ko dei sñiawngooh ya ka sorkar wa da chimkhia ko ya kini ka mat kiwa kongsan.
Puræ leh: Lai dawa ka JNC na u DMHO wow pyntikna wa krehkaam ki Ambulance, u pynbiang dawai wa kiwi de
Discussion about this post