Ynne ka sngi, ka Jaiñtia National Council (JNC) Jalaphet Circle da lai pait lai sylli ko yei thaw wa da chna ya ka Government College kawa da yang da yooluti bha kiwa chong chnong ka thaiñ East Jaiñtia Hills, wei ini i thaw toh iwa em hapoh ka chnong Jalaphet Bri-Sumer.
Ha ini i lai pait da chem wa da sdang yei kreh wow chna ya kani ka College, iwa man kam u moomær wa kongsan wow pyndap yeiwa emkaam heiliang i puræ puthi yong ka District. Ka JNC pynsñiaw ko leh yei sñiawngooh wei sñiawkmen deiwa e khublei yeini i chimkhia wow pynmankaam ya kani ka kaam wa da sahteiñ da slem bha.
Ka seiñ e ko leh yei khublei wa kyrpang ya ka sorkar MDA-2 wei da phah leh yei khublei wa kyrpang cha ka MLA ka Sutnga-Saipung, ka Santa Mary Shylla yei chimkhia yong ka wow pynkhih ya kani ka kaam wa kongsan, kawa yieñ leh kam ka sakhi yei angnood yong warohlang ki paidbah.
Hawa pdiang sñiawbha yeini i sdang wow chna ya kani ka College, ka JNC da kyntu joor ko ya u Contractor wa pynkreh wow pynthikna u wa i kaam u pyndep u deiwa bha wa miat, dei minot deiwa paka khnang wa i kreh u man i iwa lai bait lai ryntih katkam wa dawa ka kaam deiwa bood leh yei kyndon wow pyndep heipor wa da mang khnang wa ini i angnood yong ki paidbah u man ko i kyrmen ya ka imlang sahlang kamwa da thmu wow chakri.
Ka seiñ da yooluti ko wa kani ka Colleg sorkar wow em ko ka bynta kawa pynkylla dur wow kynrong yei puræ puthi deiwa kham chaneiñ ya ka thaiñ, u man ko leh ka thaw puræ kawa e myntoi ym du ya ka District tangwa ya warohlang ka jylla hi wei wow yarap ko chiboon khamtam wow pynbha yei kyrdan puræ puthi. Ka seiñ da pynsñiaw ko leh wa e u man ko ka atiar wow e bor ya ki khynroo wow roi u paar ki ha i mynried iwa tyrchaaiñ wow neh neibynta ka ri Jaiñtia hi waroh kawi.
Ka seiñ da ong ko leh wa daw booddien biang ko yeini i lai i kreh yong kani ka College wow pyntikna wa man i iwa lai bait.
Discussion about this post