Sñiawngooh ka JSU ya u Montri wa ya ka MeECL wa da pyndait ya u Transformer wa thymme ha Mukhap

Jowai: Ka Jaiñtia Students’ Union (JSU) Mukhap Unit haka khubor wa pyllait ynne ka sngi da pynsñiaw ko i mynsien wa khroo ya u Montri ka MeECL u C. Ymbon kamjooh ya u CEO ka MeECL Jaiñtia Hills kiwa da chimkhia ya i ood u naam i chitom saja ki paidbah ka Dong Thymme hapoh ka chnong Mukhap, hei yatoh wa i pyndait da u Transformer wa thymme hapoh kani ka dong.

Kam wow pynkynmoo, kani ka Dong Thymme ka Chnong Mukhap, ha uni u bnai wa dadep da yachem ki i eh i khoo khamtam ki khynnah skur nadoh wa yap uni u transformer.

Hei yatoh wa ini neiliang kiwa kitkaam ka chnong nadooh u Waheh Chnong, ki dkhot ka chnong kamjooh ki dkhot ka JSU Mukhap Unit dai lai pynsñiaw ki yeini ha ka MeECL wa ha u Ymbon, heiwa da kular ki wow chimkhia yeini i kaam.

Kamtæ da pynsñiaw ka seiñ yei sñiawngooh ya kini ki sahep ka MeECL wa uni u Montri wada chimkhia ki wow pynbiang ya ini iwa duna hapoh ka chnong iwa da pynsuk sakhiat ya ki paidbah.