Ka Khasi Students’ Union Nongbareh Unit kawa haap hapoh i pait ka KSU War Jaiñtia Circle hadien wa yoh yutip ko yei wym yoh khoo rachon yong kiwa chong chnong ka Nongbareh Rim la 5 bnai nadooh wa sdang u snem wot hapyrdi ka Lockdown COVID-19, neiliang ka seiñ da i sñiawkhia da lai yachem ki yaka SDO Supply Amlarem Sub Division ka J.U. Kharpuri khnang wow sñiawthooh wei wow yaklam ya kani ka kaam yap kaam im yong ki paidbah.
Ha katai ka yachem waka SDO, da sñiawthooh ya i daw wa ym yoh khoo rachon katai ka chnong wa toh neidaw wym chimkhia yong kiwa yahkhmat ka chnong wow pynbait yaki Dealer wow wan kit khoo rachon neibynta ki paidbah wa chong chnong.
Katkam wa pyntip ka SDO Supply, ha i por wa wan saam khoo ha Nongbareh Rim da ong wa katkam i rukom man wa lada ym em Dealer hapoh chnong wow kit ya u khoo rachnon yaki paidbah, da man ko i kamram yong ka chnong lyngba ka Vigilance Committee wow kit wow saam ya u khoo rachon cha ki paidbah chong chnong, wei na ini i daw wym bien kreh ka chnong, da pynman yaka yungkrehkaam ka SDO Supply lyngba u Inspector Supply wow wan saam hi ya utai u khoo ha ka 5 tarik uni u bnai neibynta 6 bnai nadooh u January hadooh u June 2020 khnang wa ki paidbah ym dooh khoo ki khamtam ki kup chiliang ki sem chilliang.
Neiliang ka KSU Nongbareh Unit da pynsñiaw ko ya i sñiawngooh yaka yungkrehkaam ka SDO Supply Amlarem Sub Division wa ya u Inspector Supply kiwa da wan saam hi ya utai u khoo rachon ka Nongbareh Rim. Ha i jooh i por ka seiñ da kyntu ko yaka yungkrehkaam ka SDO wow sñiawbha u chimkhia ya katai ka kaam khnang wa ki paidbah yong ka chnong Nongbareh Rim ym maad de ki ya kam ini i jia wei da kyntu wei kyrpaad leh ya kiwa yahkhmat ka chnong wow sñiawbha ki u chimkhia wow pynbait smat ya kiwon kiwon ki kaam khnang wa ki paaid chong chnong ym chem chitom ki khamtam hawa yatoh wa ki marbaam mardih wa e da ka sorkar.
Ini toh katkam ka kyrwoh na u Secretary ka Unit u Subha Lamin.
