Sñiawngooh ka MSSASA ya ka sorkar jylla wa da pynlait ya ka tulop wa 5 bnai khlem pynduna wot chi ana

Jowai: Kawi na ki seiñ wa kreh neibynta kiwa sikai SSA hapoh ka jylla ka Meghalaya SSA Schools’ Association (MSSASA) Central Body kawa mihkhmat neibynta ki Elementary Teachers wa em 5139 ngut ha ki Lower Primary wa Upper Primary ki skur SSA kawa tip nachwa kam ka “Sarva Shiksha Abhiyan” katwa katni da tip kam ka “Samagra Shiksha Abhiyan” da pynsniaw ki yei sñiawngooh da ka chithi wa da e cha ka sorkar jylla ynne ka sngi yei kreh chitom ko wow pynlait ya ka tulop wa 5 bnai kamjooh leh wow pynbna ya ka “Education Policy” kawa da yang da slem bha.

Ka MSSASA da pynsñiaw ko leh yei sñiawkmen ya ka tnat puræ puthi ka sorkar MDA kawa da chim ya ki lai luti wa chlur kiwa da e leh ya ka tulop khlem pynduna iwa T. 19,044 neibynta kiwa sikai Lower Primary wa T. 20,493 neibynta kiwa sikai Upper Primary hanlada ka Ministry of Human Resources Development, Department of School Education and Literacy, Govt of India da pynkylla ko ya ka rukom yarap poisa nadooh u Naitung (April) 2018 cha khmat wei neiliang ka sorkar da chna ko da ka Corpus Fund ka poisa wa da pynlang yow pyndap yeiwa duna na ka mang poisa ka jylla kawa kyrpang wow su tulop ya kiwa sikai SSA.

“Waroh na i kiwa sikai SSA da pynsñiaw i yei kmen kamjooh i yaroh ya u montri rangbah ka jylla u Conrad Sangma wa ya u montri ka tnat puræ puthi u Lahkmen Rymbui yeiwa da pynlait ki ya ka tulop wa dang sah wei da yooluti ki leh wa ka Arrears kawa dang sah leh u pynlait noh ko ym slem de,” ong u President ka MSSASA u Aristotle C Rymbai.

Da e khublei leh ya u D.P. Wahlang uwa man kam u Principal Secretary Education Department cum State Mission Director SEMAM wa u Ambrose Ch. Marak uwa man kam u Director DSE&L cum State Project Director SEMAM wa kiwi kiwa da kreh chitom wow yarap ya kiwa sikai SSA.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Da pynkut deiwa ong wa u Conrad man sakhiat u uwa yahkhmat wa biang wa stat uwa da ye u wanrah yeiwa miat dooh kiwa kreh hapoh yong oo kamjooh leh ya u Lahkmen Rymbui yei stat yong oo wow chim ya ki rai wa biang kiwa pynchlur leh ya kiwa sikai SSA wei kani waroh daw yarap ko leh ya ka jylla wow ku cha khmat.