Ka seiñ kiwa chet ja sngi ha ki skur watip kam ka All Jaiñtia Mid Day Meal Workers Union Central Body hei yahkhmat u Jerry A Suting kam u President chirup i emlang ka Jena Nengnong President Cook cum Helper na East Khasi District, u Charles Shongwan General Secretary na Ri Bhoi District chirup wa kiwi won kiwa yahkhmat, ynnin ka 26 tarik da lai yachem ki ya u montri ka chnat puræ puthi ka sorkar jylla u Rakkam A Marak wow pynsñiaw i sñiawngooh ya ka sorkar jylla hajrong i chimkhia ko u pynku T. 1000 chibnai naka T. 100 kamwa jooh su ko cha kiwa chet ja skur arphaw snem tam nachwa.
Deini i pynku ka sorkar jylla kamwa man kattæ kiwa chet ja skur yoh ki T.1100 na ka bhah ka sorkar Jylla, T. 900 na ka sorkar pyrdi, wei hawa kheiñlang pynar, i su ya kiwa chet ja skur da man i T. 2000 chibnai.
Hawa pynsñaw leh i sñiawngooh yaka sorkar wa da sdang pynpoi ko yei su man u bnai lyngba ki Bank Account yong ki palat khatphra hajar ngut ki Cook cum Helper PM POSHAN ha ka jylla, da kyrpaad ki leh wow pynlait noh yaka poisa wada kular ko u su nadooh u Naitung 2022.
Kam ka seiñ wada yahkhmat u yakhih hadooh wa ka sorkar jylla leh da pdiang ko u pynku i su cha waroh kiwa Cook cum Helper, da ban joor haroh ko ya u Montri wow pynyoh noh da ki tadong chet (LPG), u pynpoi um sorkar haki kamra chet yong ki skur khnang wa kam kiwa chet ja u yoh ki yei doh i pran wa chait wa khlan kamjooh leh yow lait chah ktah wara ka rymaw deiwa pynemkaam u chet daki dieñ.
Ka seiñ da kyrpaad ko leh ya u montri wow yaklam u waka sorkar pyrdi heiyatoh wow pynku noh ko ka bhah wa jooh su ko cha kiwa chet ja skur ka thaaiñ mihsngi khamtam ya ka jylla Meghalaya kawa maad yei sya’at dor ki mar baam ha ki yaaw ki hat, i sy’at hei puræ puthi.
Kamjooh leh u yaklam neibynta ka chuti ya kiwa chet ja hawa kjut chitom ki khamtam ya ki manbei.
Ha kani ka sngi wa lai yachem ki wa u montri i puræ puthi da emlang leh u MLA ka Rambrai Constituency.
