Ka chnong Sohphoh wa em hapoh ka West Jaiñtia Hills District, Meghalaya da kani khubor na u General Secretary ka chnong Sohphoh u Mutshwa Thabah da pynsñiaw ko yei sñiawngooh hadooh kattæ kattæ ya ka Jaiñtia Hills Development Society (JHDS) kawa da wan e yarap ya ki khon ka chnong ha kam ini i por wa em ka khang chnong neibynta wow yaleh pyrchah yei kjut khlam COVID-19.
Ha ka 20 tarik uni u bnai, ka JHDS hei yahkhmat u Director yong ka u Rev. Fr. Manbha Pakem deilang wa u Rimi Pyngrope da wan ki wow e yarap da u khoo cha ki 35 tylli ki manyung kiwa da tyngkhooh yei eh neidaw kani ka khang chnong. Kiwa boon kam kini ki manyung toh kiwa chaniah hei khih mylla sngi yow im ja-kpoh wei kiwa dooh waduk.
Hei klam wa tbian chwa wow saam ya u khoo cha kiwa chong chnong, u waheh chnong, u Kishon Kharsahnoh, da e khublei sñiawngooh u ya kani ka seiñ, wa ki wakreh yong ka, kawa jooh yarap ya ki paidbah ka chnong ha kiwa boon ki bynta, kam i kaam rep kam riang, ki symbe ki rne wa kiwi tawan, khamtam wada wan ki wow yarap ha kam kani ka por wa boon ki paidbah da em ki ha i kutlaad neidaw wym yoh de ki u lai khih lai kreh.
U waheh chnong da pynsñiaw u leh yei sñiawdiaw yei slem ka sorkar wow e yarap cha kiwa dooh wa duk, wa khih mylla sngi kamwa da kular ko ha ki khubor neibhah katwa dang lai ki sngi khang chnong, ki bru dang chem chitom ki khamtam hei ku dor ki marbaam mardih. U Rimi Pyngrope, hei klam yong oo, da e mynsien u yaki paidbah wym hoi u dooh kyrmen neidaw kani ka kjut. Da kyrpaad u leh ya kiwa chong chnong wym hoi u ngiat beij ki ya ki khubor ka khleiñ ka lat’ap wow pynklumar yei thih i pyrkhat yong ki, toh u bood ki yei kyndon wada e ka sorkar lyngba ka chnat i chat i khiah.
U Director ka JHDS, u Fr. Manbha Pakem, hei klam yong oo, kyrpaad u ya kiwa chong chnong wow man ki kiwa lehkhooid, kiwa bood yei kyndon wada booh ka sorkar, wei khamtam wow ya krehlang wa kiwa pynlai chnong neibynta i bha i miat yong waroh lang. Da ong u wym hoi u kheiñstiñ ya kani ka kjut hanlada wym pu em ko ha ki thaaiñ yong i,tangwa toh u man i kiwa sumaar bha deiwa kiar na i lai i wan cha kiwi tawan ki thaw, wow ya lum paidbah, wei wow bood ya ki kyndon hawa thied wa pet, hawa lai cha ki Bank wei wow mih na yung du hawa emkaam bha. Da pynkynmoo u leh wow man ki bru wa sbun mynsien, kiwa smat u yarap kylliang lada heiwon iwon i bynta wa ki jan yung jan sem emkaam yarap ki. Da ong u leh wym hoi u man ki bru wa khuslai yumut pyrkhat neidaw kani ka kjut, toh u man kiwa kmen, neibhah boonsien lada khuslai, ym yah ko cheiwa bha, toh u chaniah ha u Blai wei kamjooh u sumarbha ya i-dæ.
Hei klam pynkut, u Secretary chnong da e khublei u ya ki wakreh ka JDHS, ya kiwa yakhmat ka chnong nadooh u waheh chnong, u Chairman chnong u Hariswell Talang wa ki dkhot wada ye u emlang, kamjooh ya kiwa chong chnong.
Lyngba kani ka khubor, kiwa yahkhmat ka chnong da kyrpaad ki leh ya kiwa mihkhmat ka thaaiñ, nadooh u MLA, MDC lada emlaad wow sñiawbha ki u yarap ya ki khon ka chnong ha kam kini ki por wa ki paidbah em ki ha i eh wa khroo wa ha ka kutlaad ha kiwa boon ki bynta neidaw kani ka khang chnong.
Discussion about this post