Ka Synjuk Ki Waheh Shnong Ri Jaiñtia (SWSRJ) da iwi i yumut, sñiawthooh ko wow e ko i sñiawngooh sñiawburom ya ki MLA yong ka Ri Jaiñtia kiwa da ye u wanrah ya ki kaam pynroi pynpaar hapoh yong ka Ri Jaiñtia ha kiwa boon ki liang, kamtae ha kani ka kynti leh ka SWSRJ dap ko dei mynsiem wa kmen hawa yoo ko yei mynsien kreh chitom u MLA yong ka Jowai u W. Shylla wa u MLA yong ka Shangpung u C. Ymbon chirup leh wa u MLA yong ka Mowkaiaw u N. Sungoh kiwa da ye ki u pynngait ya u Chief Minister wa em burom u Conrad K Sangma wa ka kynhun yong oo hapoh ka lama yong ka sorkar MDA hei wow wanrah ya ka Mini Secretariat ha Jowai ka wow e chiboon i kyrkhu ya ki khon yong ki chnong Jowai kamjooh ya ki khon yong waroh ka Ri Jaiñtia wa da tip che wa kat da kani ka yung krehkaam toh kawa ye u booh boon tylli ki chnat krehkaam ka sorkar.
Heijooh i por leh da ye kini kiwa mihkhmat wow kyrriah ya ka Headquarter yong ka North Division PWD Roads na Jowai cha Shangpung kawa man kawi na ki chnong wa pawnaam hapoh ka Ri Jaiñtia, kani leh man ko i kyrkhu chiboon ya ki chnong hapoh ka Laskein Block wa ki parajan yong ka, kamjooh leh deilang ya ki khon yong ka ri Jaiñtia hi waroh kawi.
I por hi da klam ko kam chibynta wow pynsuk ya ki paidbah wa wan emkaam cha kani ka yung krehkaam yow lait nei khynnia khynrah, wei i thaw wa booh ym toh iwa jngai, ki kari mator leh suk u yoh u wan cha kani ka thaw wa booh ya ka. Kamtæ nalor kini ki kaam lehbha yong ka sorkar kyrpaad leh yaki MLA yong ka Ri Jaiñtia wow thooh chooh chooh ki ki laad ki luti u wanrah ya ki myntoi ha ki thaw sor wa cha palatsor kam ki sarok, ki skur, College sorkar, ki yaw ki haat, ki laad yoh kaam yoh jaam wa kiwi kiwi ki myntoi.
Ka Synjuk da e ko leh i kyrkhu kyrdoh ya waroh kiwa mihkhmat yong ka Ri Jaiñtia yow yoh ki dei chait dei nang hajrong itai i lehbha wa ki kaam pynroi pynbha kiwa ka Ri Jaiñtia da yoh ko ha ki artylli ki thaw, kamtæ ka SWSRJ khutlang ko ya waroh ki khon ka ri Jaiñtia wow man ki kiwa ya maya yatylli, ka Synjuk kyntu ko leh wa ym hoi u man u sñiaw chah leh chilliang wei wow sangeh yei yakhih pyrchah, u sangeh i addnood addkpoh para-i wei wow man kiwa yahkhmat kiwa stat kiwa yait na i yaleh ya kynaad. Kamtae ka SWSRJ beiñjoor ko ya kiwon kiwon ki seiñ ki Synjuk kiwa yah sñiawthooh bakla ya ki paidbah yong ka Ri Jaiñtia heiyatoh wa kani ka kaam, ka Synjuk kyrpaad ko ya ki paidbah wa chong chnong ka Jowai wa kiwi ki chong yong ka Ri Jaiñtia u man ki, kiwa pyrkhat arsien ha chwa wow kynthih chaphrang.
Ka kyrwoh na u President ka Synjuk Ki Waheh Shnong Ri Jaiñtia.
