Ka seiñ War Jaiñtia Students’ Union (WJSU), dap ko dei kmen wei sñiawngooh ya u MLA ka 7-Amlarem Constituency, u Lahkmen Rymbui hajrong i chimkhia yong oo wow klam hapoh ka yung dorbar chna aiñ ka jylla ya ki phang wa emkaam neibynta u wanrah i roi i paar haka thaaiñ Amlarem, kiwa man leh ki phang wa neiliang ka seiñ WJSU da mih ko chakhmat wow dawa naka sorkar.
Ki phang wa da klam u Lahkmen Rymbui kamwa ka seiñ leh da dawa ko, kynthup i neibynta u chna yaka Transit Dawki LCS sa ha Muktapur, wei kani man ko kawa emkaam bha neibynta u pynku yei yoh i kot ka thaaiñ waka jylla hi waroh kawi lyngba i chalan moochuni na Syndai-Trangblang Limestone Belt wa kiwi won ki jait mar wa pynmih wa ye u pynku yaka yarong poisa ka thaaiñ waka jylla waroh kawi.
Neitæ i emkaam wow yoh kattu katni tylli ki yung krehkaam sorkar hapoh ka Amlarem Sub-Division yow suk ki paidbah wa kynthup leh yaka PWD Division ha Amlarem.
Ka seiñ da ong ko wa ini i dawa man iwa chong hok chong nia, neibhah kani ka Civil Sub-Division toh kawa da rim tam ha ka jylla, heiwa kiwi tawon ki Sub-Division da yoh u man kam ki District deiwa pynku kyrdan ya ki.
Kamtæ ka seiñ kyntu joor ko yaka sorkar jylla wow smat chimkhia yeini, wei daw booddien ko hadooh wa yoh, deiwa yooluti u mankaam lut ki hachwa wow lehkmen ka Civil Sub-Division yow moomær Golden Jubilee wa dap 50 snem.
Hawa e khublei wei sñiawngooh ya u MLA ka Amlarem Constituency, ka WJSU e ko leh i kyrchaan wa pura heiyatoh wa kiwi won ki phang dawa yong u Lahkmen Rymbui neibynta i myntoi ka thaaiñ wa ki paidbah wa chong chnong.
Discussion about this post