Ka Hynñiewtrep Achik National Movement (HANM) East Jaiñtia Hills haka kyrwoh khubor da ong ko wa sñiawphylla ko wow tip wa du nei ujor uwi u bru u wym toh leh uwa chong chnong ka Meghalaya, ka Lokayukta da phah ko daka takit wow pynman daka CBI hajrong i khayi mooyong ha East Jaiñtia Hills District.
Da ong wa hadien wa khang ka Supreme Court wow challan mooyong, da em ki kattu katni na i por cha i por wow challan mooyong tooh ym du na East Jaiñtia Hills District kamjooh leh na kiwi ki District hapoh ka jylla kiwa em mooyong. Wei ki pulit leh man ki kiwa paitbniah ya ini i kaam wei da em hadooh palat 600 tylli ki mukotduma heiyatoh wa kani ka kaam tangwa kattæ leh dang em kiwa lait iwa ym em mut wa tlot ki pulit pulit wow kreh yow kdoh u khoom yei challan tooh ya u mooyong.
Ka seiñ da pynbaad ko leh wa uwa ujor toh u bru uwa da chah pynngat ha kiwa boon ki kaam pyrchah aiñ wei da leh u yeini yow pynhiar tput deiwa pynbaad yaki pulit East Jaiñtia Hills District wa ya u DC Khliehriat wei lada katkam ka ujor wa da jia i challan tooh ya u mooyong cha kiwi ki District, ileh ym dawa yaka takit daka CBI ha waroh ki District wa em mooyong, wei ini pynyoo wa da leh dei thmu wow pynhiar tput.
Chooh chooh ka seiñ da ong ko wa nadooh wa wan u Superintendent of Police, East Jaiñtia Hills District wa katni, da yoh wow kem ya ki bru wa khayi drug wa boon jait wei ye u man uwa ujor toh uwa khayi leh ya kini ki jait drugs ym ye wow tip.
Ka seiñ da pynche ko leh wa ym em kyrchaan ko ya kiwon kiwon ki jaitkaam wa pyrchah yaka aiñ tangwa deiwa yoo yei long i man kwah ki wow khana yei sakhiat wa lada takit ka CBI ileh da leh du hapoh ka East Jaiñtia Hills District donhi.
Da pynkut deiwa ong wa ym emkaam wow takit ka CBI heiwa ka sorkar jylla ye ko wow chna daka SIT yow pynman yaka takit ym du hapoh ka East Jaiñtia Hills District.
Discussion about this post