Sñiawphylla ki 4 MDC ka JHADC yei wym yoh tulop hanlada ka poisa em ko

Jowai: Heiyatoh wa i wym yoh tulop ki wakreh ka Jaiñtia Hill Autonomous District Council (JHADC) wa ki MDC yong ka Council, ki MDC yong ka BJP kiwa em ha i liang pyrchah hapoh ka yung dorbar, da dap ki dei sñiawphylla ya i wym ye ka EC wa katni wow su yaka tulop ki wakreh wot lada ka poisa em ko.

Neiliang ki soo ngut ki MDC ka BJP hapoh ka JHADC kiwa kynthup ya u Lakhon Biam, u Krison Langstang, u J. Treilang Suchiang wa u Dawan Lyngdoh, da ong ki leh wa katkam ka Official Report wa da e ka EC hapoh ka yung dorbar, wa ka Fund Balance yong ka Council kat hadooh 28-02-2019 da em ko hadooh T. 2,70,70,037, kamjooh leh ka poisa wa da yoh pdiang naka sorkar jylla cha ka Council kam ka Royalty yong u mooyong nadooh ka 01-03-2019 hadooh ka 15-10-2019 man ko T. 15,00,00,000. Katwa i yoh pyllang wa man u bnai lyngba ka Receipt Cell yong ka Finance Department nadooh ka 01-03-2019 hadooh 31-10-2019 da poi ko hadooh T.4,22,45,757 kamjooh leh i yoh lum na ka chnat Revenue lyngba ka khayi ki baar jylla (Trading by Non-Tribal) nadooh ka 01-03-2019 hadooh ka 31-03-2019 da man ko T. 78,78,640 haka chi bnai.

Chooh chooh kitai ki soo ngut ki MDC, da ong ki wa katkam i pynmih khubor u CEM ka JHADC u Thombor Shiwat ha ka 26-11-2019, wa ka Council da yoh pdiang ko yaka poisa (Fund) kawa da poi hadooh T. 26,00,00,000 na ka sorkar jylla kam ka bhah yong ka Council.

Kamtæ waroh ka poisa wa da yoh lum da ka Council naki dan waphær nwaphær nadooh kitai ki tarik kamwa da kdaw haneiñ da poi ko hadooh T. 48,71,94,434 wei lada kheiñlang wa ka Special Assistance Grant (SAG) kawa hadooh T. 16,50,00,000, kawa da pynemkaam bakla (Divert) wow su tulop kawa da poi waroh hadooh T. 65,21,94,434 klur.

Related posts

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

Ha i yong sakhiat ka tulop ki wakreh wa ki MDC ka JHADC da poi ko hadooh T. 6,06,89,207 klur chi bnai. Wei lada su ya ka tulop ki wakreh wa ki MDC nadooh u Wisu (March) hadooh u bnai Kmaichonglad (Dec) 2019 u poi ko T. 60,68,92,070 klur. Hajrong ini, neiliang kitai ki MDC BJP da booh ki yei kylli ya kani ka EC wa katni kawa yahkhmat da u T. Shiwat, wa ileh wa ka Council kamjooh leh ki MDC, da yoh tulop du hadooh u Naisaphra (Aug) heiwa hei yong sakhiat lada su ya ka tulop ki wakreh wa yaki MDC hadooh u Kmaichonglad (Dec) 2019 leh ka poisa dang tam.

Neiliang ki soo ngut ki MDC ka BJP da dawa ki wow su syndon yaka tulop yong ki wakreh wa yaki MDC ka JHADC hadooh u December, 2019 hawa ka poisa em ko hapoh ka Council.

Neiliang kitai ki MDC da ong ki leh wa ya ka SAG Scheme, ym em ki kyndon (Guideline) kiwa chah wow pynemkaam ya katai ka poisa yong ka SAG cha kiwi won ki kaam, lait noh wow pynkrehkaam ya ki kaam kiwa yatoh waka roi ka paar.