I sih u sarok NH-6 da wanrah ko ya iwa boon i eh i khoo yaki paidbah khamtam haka thaaiñ Narpuh hadooh wa ki sieñ kiwa yah kari kamai, ki seiñbhalang waki bru paidbah leh da maham ki wow dam u su bai Tollgate kat wym pu pynchna noh ya uni u sarok iwa da wanrah yei mynsoo, i sahkut kari kamjooh i kylla kari ha tymbud uni u sarok iwa da pteiñ leh chadooh ka sarok Jowai Bypass.
Ki chnong khamtam nadooh Kuliang, Umkiang ter ter chadooh Malidor toh kiwa da sakhi bha ya ini waroh heiwa du ha kani ka tayaw nadooh ka sngi thohdieñ leh da em biang i sahkut kari.
Kiwa boon da pynbaad ki yaka NHAI ka wym chimkhia wow pynchna ya uni u sarok uwa da sih hadooh wym yahap de wow tip kam u National Highway.
I sahkut kari da ktah ko leh ya kiwa kjut wa chitom nadooh kiwa wan na Assam lyngba uni u sarok heiwa i pynlait kari iwa wanrah nei kylla ma kylla kari biang da pynman ko yaki paidbah wym neh chah de ki ya ini i wym kut de wei iwa jia ma jia.
Ini i sahkut kari katæ da neh i la le sngi heiwa yow taan ya ki le tylli ki Truck wa kylla ha i jooh i thaw ha Umkiang wa i pynlait kari da hap wow mih lang waki paidbah yow yarap yaki pulit ka Umkiang iwa da pynkthang yaki paidbah kiwa da kylli mynnu u lait na ini.
Ka Seng Samla Shnong Umkiang leh da beiñ ko yaka NHAI ka wym chimkhia ya ini i kaam wow pynchna ya u sarok nadooh na Umkiang chadooh Malidor wei da yaroh ki leh ki ya ki pulit ka Umkiang kiwa chimkhia wow pynlait kari miet wa sngi, da ong u Vice President u Methonal Chadong.
