Tura: Ka Don Bosco Higher Secondary School, Tura, kawi na ki thaw puræ wa pawnaam ha ri-loom Garo da leh kmen ko yei dap 60 snem heiwa da wan sakhi u Montri Rangbah u Dr. Mukul Sangma kam u kongsan ynnin ka sngi.
Kani ka skur toh kawa sdang ha u snem 1957 kam ka Lower Primary School da u (L) Rev. Fr. Anthony Buccieri, SDB, u Missionary na ka ri Italy dei thmu wow pynku ya ka puræ puthi kawa ha itu i por toh kawa dang chem chitom bha wow sdang ha ri-loom Garo. Ha u snem 1964 da pynku kyrdan ya kani ka skur cha ka High School katwa ha u snem 1988 da sdang won sa ka skur miet wa tip kam ka Don Bosco Night School yow ye kiwa da kreh u lai skur hei miet. Ya ka Higher Secondary won da sdang ha u snem 2014.
Kani ka skur da pynmih ko boon ki bru wa pawnaam ka ri-loom Garo ka u (L) P.A. Sangma, ki Montri wa rim ka sorkar jylla kam u (L) L. A. Sangma wa u (L) Cyprian R Sangma wa kiwa boon ki Doctor ki Engineer wa kiwi kiwi.
Kani ka thaw puræ toh kawa biang leh ki thaw yalehke sports, i thaw sikai tem sur wei ha ki Result MBOSE leh da leh bha ko.
Kani ka skur katni em ko hadooh 2,000 ngut ki khynnah wa puræ ha ka.
Ha kani ka lehkmen da em leh u Bishop ka Tura, Rt. Rev. Andrew R Marak u MLA ka thaiñ u N.R. Marak, CEM GHADC u Boston Marak wa kiwi kiwi.
U Montri Rangbah ha kani ka sngi da wai u leh ya u moo-yurim wow chna ya ka Indoor Stadium kani ka thaw puræ kawa daw yoh yarap na ka sorkar wow chna ya ka.
Hei klam yong oo da ong u wa sñiawngooh u ya ka Salesian Society wa sdang ya ka Don Bosco School ha Tura kawa da e ya i chakri cha ki paidbah kawa da wanrah yei kylla hapoh ka jylla.
Heijooh i por da ong u wa sñiawsih won u yoo wa ki skur sorkar kat dang slem dang hiar ki.
Da ong u leh wa sñiawthooh u yei chitom kini ki thaw puræ u yoh ya kiwa sikai kiwa biang kiwa bien u neh slem khlem yarap ka sorkar wow su tulop, wei ka sorkar hi hanlada duna poisa ko da booh poisa ko neibynta ini.
Discussion about this post