U Montri ka sorkar pyrdi wa pait ya ka Law & Justice, u Kiren Rijiju hawa wan cha Shillong ynne ka sngi da pynsñiaw u yei sñiawskem wa ki kaam kajia pood ha ka thaaiñ North East daw ye u pynbait noh ki hapoh i yahkhmat u Amit Shah kam u Union Home Minister.
Da ong u leh wa da e ya ka rynsan wa bha ya waroh ki jylla yow ye ki Montri Rangbah wow kreh heitæ i rukom wow wanrah yei pynbait pood deiwa suk wa saaiñ hapyrdi kiwon kiwon ki jylla ka North East.
Chooh chooh da ong u wa ki dak ki chin da yoo ya ki heiwa ki Montri Rangbah wa da lai yachem ki wa u Amit Shah uwa da chimkhia wei paitbniah ya ini i kaam. Deiwa kdaw leh wa ka Meghalaya waka Assam katni dang yang ki yei rai wa khaddooh ka sorkar pyrdi heiyatoh wa ki 6 tylli na ki 12 tylli ki thaw khappood ki ar jylla.
Heiyatoh won wa em ki por wa mih i mynsoo mynsnaam ha ki bynta khappood, da ong u wa ini em i por da jia neiwa leh ki kattu katni ki sahep sorkar kamjooh da ki bru paidbah iwa da pynmih yei kynaad wei man i i kaamram ki sorkar jylla wa ki bor District wow pyntikna wym jia kam ini wei toh u em leh i yaklam yow pynbait ha i rukom wa bha tam.
Heijooh i por da ong u wa emkaam wow syndong bha ya ini i kaam wei kam ki jylla wa em hapoh ka thaaiñ North East ym em man ki kiwa yachoon uwi ya uwi wei toh u pynyoo i wa ye i wow ya imlang deiwa suk wei wow pynbait ya iwon iwon iwa sñiaw yaphær.
