Ka chnong Jowai da yoh ko wow pynhiar mynsien chibet chipor deiwa wan uwi uwa chong chnong ka Moolamylliang uwa tip kam u Damewanhi L. Rymbai uwa man leh kam u Assistant Waheh Chnong wow chah ya ka Jowai Municipal Board wow noh jhep chapoh ka krem tih mooyong (Box Cutting) u wa em ha Pynsymroo, Moolamylliang, EJH.
Ynne ka sngi da soi ya ka soskular hapyrdi u Damewanhi waka Jowai Municipal Board (JMB) yow pynemkaam ya ini i thaw yow noh jhep neibynta chi bnai deiwa su cha oo T. 700 chi trip.
Da booh kyndon wa ki Truck ka Municipal toh u man ki kiwa da tymmoh bha, u pynchna yaka luti wow lai cha kani ka paar mooyong wei u man i i kitkhlieh ka JMB wow kær ya ini i thaw yow lait ki mrad u psiah wei wow pyntikna leh wa ym em da kiwon kiwon kiwi wa wan noh jhep cha kani ka krem mooyong.
Ka JMB toh u pyntikna ko leh wa ym mih iwon iwon i sma i tung wei hadien wa kut i por toh u e biang yei thaw cha u tre hadien wa da dep tymmoh khyndaw ya ini i krem mooyong.
Kamwa man kattæ ka yakut toh wa chah bait yow kit ya waroh ki jait jhep wa kynthup lang ya ki Plastic wow noh hapoh ini i krem mooyong wa yillu 200 phut wei du ha kani donhi kawi ka krem mooyong ym toh chawi lane charood.
U Damewanhi da pyntip u leh wa yeini da leh hadien wa da mynjur ka chnong.
