Hanla ki paidbah da hap ki wow maad yei eh hei lai i wan, ka sorkar da lai ko chakhmat yow pynchna ya ka yingkieñ Dam Umiam wei yeini da sdang nadooh ynnin ka 13 tarik.
Yei chna ya kani ka yingkieñ Dam da leh da ka ITD Cementation India Limited kawa da sdang wow siam thlu ha ki bynta yong katai ka yingkieñ yow thap khyndaw-bilat ha ki thaw wa da tlot.
Neidaw ini waroh, neiliang ki bor pulit yong ka Ri-Bhoi da hap ki wow pynrkhiñ yei lai i wan ki kari ha katai ka yingkieñ yow lait nei sahkut kari deiwa pynlai ya ki kari kiwa ku cha Shillong na Umroi ter ter chadooh Shillong lyngba ka surok VIP Road, ya kiwa hiar na Shillong cha Nongpoh-Guwahati da e laad wow lai lyngba katai ka yingkieñ Dam.
U Construction Manager ka ITC Cementation India Limited, u Hanuman Kalamb, da khana u wa i sdang yow pynchna ya kani ka yingkieñ Damsite toh hadien wa yoh bor na ki bor ka sorkar Meghalaya kiwa da e bor hadien 4 bnai wa da dep paan bor wei da sdang yei kreh deiwa siam thlu ha ki bynta yong kani ka yingkieñ yow thap khydaw-bilat ha kitu ki bynta kiwa da tlot kani ka yingkieñ.
Da khana u leh wa ini kreh daw ktah ko yei lai i wan ki paidbah khamtam ki kari wa heh wei lada u kreh kamwa da thmu da mang, daw ye u pydep hapoh 4 bnai wei ini deiwa kreh miet wei sngi.
Da khana u leh wa hadien wa dep u pynchna ya kani ka yingkieñ daw ye ko u chaan sa kamwa 25 snem wei da ong u leh wa i daw wa tlot ko toh neidaw wa e laad ya ki kari kiwa heh wa kiwa kit khia wow lai na kani ka yingkieñ Dam deiwa pynrap wa na ki yingkieñ Dam ym jooh rap chem wa chah u lai da ki kari wa heh wa khia.
Discussion about this post