Da u C. Pynsakhiat Yeini Kyndiah, Loompyrdi Iongpiah Jowai
Hawa biang ka niam katkam ka hukum,
Hajrong ka adong waman ka dustur.
Wa sikai yow bru wow tip yow Blai,
Ka luti i suk ha sla pyrthai.
Soo sngi le yaw kini de dapoi ki,
Dasmur i chnong i thaw yong ka bom ka bhuri,
Ya ka niam chaad Behdieñkhlam u pdiang ika,
Na yung ha lait deiwa khooid wa suba.
Nadooh narim wa pynkyntang pynsarot,
Hajrong ki hukum adong u Tre-kirot.
Wow burom makhane sa ya ki Blai chnong Blai thaw,
Ya kiwa dadep pynchong hajrong ka Bei Rym-aw.
Ha’u ni u 2020 won daman kamni,
Dasah khanatang ha akher ki sngi.
Wapoor ka khlam waroh ka pyrthai,
Sñiaw kamwa datkoh ki hukum adong Blai.
Ya ki aiñ sorkar hap duk i u kohngooh,
Han ladymyoh i u ya chaad kamwa jooh.
Wymem iwa tymbuiñ iwa duna,
Sarin ka niam da pyndep hi i kamwa nachwa.
I ngooh i dem wa man i swar Blai,
Na’u thylliej ksiar uwa dadep sai.
Ka Behdieñkhlam kam i pyrtuit yong ka,
Yoh sakhiat ko u panang ya kani ka chitom saja.
Ya ka Behdieñkhlam daleh da ki khon ka niamtre,
Ryngkat ki kaam niam wa pyndep wa e.
Wow paan naki Blai yei kyrkhu khyrdoh,
Han ya phær i hei ngait yow ya chait lang i waroh.
