Da u C. Pynsakhiat Yeini Kyndiah, Loompyrdi Iongpiah Jwai
Ha ka step Muchai dang step synñyaw,
Ka sngi wa khaddooh ki soo sngi le yaw.
Khon ka Loompyrdi da ya mih waroh,
Khmat chynrang u yalai cha yung Langdoh.
Choh wa put ka bom ka bhuri,
Ya pyllang paidbah ha Myngkoi Pyrdi.
Manda poi u Sangot Pakyntein wow Harnamooid,
Yoh u tyngkheiñ yei por i samooid.
Dieñ she dieñ chan ha tympha yong ki,
Ngooh dem da’u Kñi ka Loompyrdi.
Heitæ yoh u tyngkheiñ yow snem yow bnai,
Yoh u paan yei kyrkhu ha pyrthai.
Na Myngkoi pyrdi hadooh wapoi yung Langdoh,
Wa ya risa wa ya kynhoi waroh waroh.
Khmat chynrang waki dieñ khlam khian ha kti wa ksoh,
Yoh u lai li kyntiñ khnong cha yung Langdoh .
U Harnamooid ya ka bom heitæ darah,
Ya ka Loompyrdi cha yung Langdoh u yah.
Chibet chipsoh u chaad ha yung Langdoh manda poi,
Ha ka sien wa nyngkong u e pyrnah na’u Dolloi.
Yow klong yow skoo u Dolloi da e kti,
Yoh u bujai u sarai da’u Kñi ka Loompyrdi.
Ya ki Blai ki Syiem wa ngooh wakhut wa tiñ,
Dep neitæ ya ki le tylli ki khnong yoh u kyntiñ.
Dep neini bait bait cha Myngkoi Pyrdi,
Ka sien wa nyngkong dadep chooh i.
Ka niam da pyndep ka rukom ka jooh hi,
Phær du ka ñia ka yutang donhi.
U Harnamooid darah yaka bom naka jooh ka luti,
Ha ka sien wa ar cha yung Langdoh biang u lai i.
Sa na’u Langdoh yei pyrnah u e kti,
Yoh u bujai u sarai biang u Kñi ka Loompyrdi.
I jooh i rukom pyndep kam ka sien wa nyngkong,
Hajrong hi ki Hukum waki Adong.
Dep neini yoh u sdang noh ka choh thyndai,
Haman ki thyndai yung yei kyrkhu u paan naki Blai.
Kai parom donhi heini yoh u khana,
Ha’u ni u snem wada phær neiwa nachwa,
Han kattæ ai leh biang thij ki kaam niam waroh,
U pynhun yei mon ki Blai u diang yei kyrkhu khyrdoh.
