Jowai : Ka Dorbar Chnong Wapungskur, East Jaiñtia Hills District da pan yabor ko na ka National Highway Authority of India (NHAI) wa toh u su chwa ko ya ka bai khyndaw næ ka bai thaw (Land Compensation) cha waroh ki tre thaw tre yung kiwa haap hapoh u pood u ang ka chnong ka wa ka NHAI da dep ko u sorjamin nei bynta wow dakhol yow pynheh surok.
Ka NHAI da dep dakhol ko yei thaw nei bynta wow pynheh pynkmai ya u surokheh NH-44 nadooh Soomer hadooh Mailidor uwa lai luti leh na ka chnong Wapungskur. Ka NHAI da dakhol yei thaw yei bhawna waroh ar liang ki rood surok.
“Ka Dorbar Chnong Wapungskur yieñ ko ha ka nongrim katkam wa da dep yaklam wa u Deputy Commissioner yong ka East Jaiñtia Hills District, u W. R. Lyngdoh chirup wa ki ophisar yong ka NHAI nadooh ki por nachwa, heiwa da dep mynjur wa toh u su chwa yei bai khyndaw chwa u kreh u chna ya utai u surok.
Kamtæ ka chnong ym elad ko u sdang u chna pynheh ya utai u surok wa lai lyngba ka chnong lada ym biang i su cha waroh ki wa toh u yoh ya ka bai khyndaw baithaw.
“Ka Dorbar Chnong Wapungskur da pynsñaiw ko leh yei kmen wa khroo hadooh kattæ kattæ wa ka NHAI da sdang ko u pynkreh ya utai u surok ha ki kattu katni ki bynta yong oo, tangwa ka Dorbar Chnong Wapungskur hi da yieñ skem ko ha ka nongrim wa ya ka hok ki paidbah nongchong chnong yong ka chnong toh u yoh chwa ki ya ka bai khyndaw na ka NHAI yow lait i mih iwon iwon i thut hei kreh ya utai u surok.
Kani toh ka khubor wa da phah u waheh chnong ka Waheh Chnong ka Wapungskur u ma Satly Ryngkhlem
Discussion about this post