Jowai: Katkam ka yutip wa da yoh, da ong wa ynnin i janmiet uwi u bru ya uwa tip kam u Ialam Suting na chnong Moosakhia, West Jaiñtia Hills da suba wa da ngam um u ha Wahumtalu.
U Ialam Suting toh uwa 18 snem wei toh u khon ka Dian Suting wei da suba wa ngam um u hadien wa yoo wa lai u cha liang kani ka wah wei da chem leh ya ki sula yong oo harood ka wah.
Hawa yaklam wa u SDPO ka Amlarem Sub-Division, u Donkupar Moksha da pyntip u wa neiliang ki pulit wa ki bru ka Fire and Emergency Service wa ki VDP kamjooh leh ki dkhot ka chnong da yaleh ki wow thooh ya u Ialam na kani ka Wah tangwa neidaw wa joor u slap wei kmai um da sangeh noh chwa wow thooh ya oo.
Da pyntip u wa mynstep da phah wan sa ya ki bru na ka SDRF wow wan yarap wow thooh ya u Ialam.
