I yakhih kiwa kamai kari hapoh ka lama yong ka Meghalaya Joint Action Committee of Commercial Vehicles (MJACCV) iwa da lai la 4 sngi kattu, wei ini i yakhih da ktah joor ko leh ya kiwa dooh wa duk khamtam kiwa khih mylla sngi.
Hanlada ki paidbah chem chitom bha ki, neiliang ka sorkar dang suki bait ko hadooh katni, khamtam u montri ka chnat Transport, u Sniawbhalang Dhar ympu em u ong u iwon iwon hajrong ini i yakhih wei da pyrchang kiwa pathai khubor wow yachem wa oo tangwa ym em u ha kamra kreh lait noh u Symbood Montri Rangbah, u Prestone Tynsong uwa da kyntu ya kiwa kamai kari wow sangeh noh i yakhih tangwa ym em u kular u iwon iwon leh deiwa ong donhi wa ka sorkar dang bichaar ko yei dawa.
Ini i yakhih wow pyrchah ya i ku dor i phniang kari toh iwa ki paidbah sñiaw yahaap ki wei da e kyrchaan ki leh neibhah ym jooh rap em ki seiñ wow yakhih manda ku dor ki mar baam.
Heiyatoh wa u Sniawbhalang Dhar, kiwa pathai khubor da pyrchang ki wow lai cha kamra krehkaam yong oo ha Secretariat nadooh wa sdang i yakhih ha ka sngi Walang ka 3 tarik hadooh ynnin ka 5 tarik khlem yoh u yachem wa oo, wei kiwa kreh kiwa em ha kamra yong oo da pyntip ki wa u Montri ym wan kreh u.
