Sumaar ki Doctor ka NEIGRIHMS yei jait kjut wa em du uwi na ki 6.87 Million kiwa yoh

Ki Doctor ka North Eastern Indira Gandhi Regional Institute of Health and Medical Sciences (NEIGRIHMS) hei sien nyngkong hapoh ka jylla Meghalaya wei ye u man leh ka sien wa nyngkong ha ka thaaiñ North East da ye ki wow sumaar ya uwi u bru wa yoh yei kjut sner wa yaar bha wa em wa yoh.

Uni u bru wa dang khynroo kat dang lai i por nang joor i chitom u wow riñ mynsien ha ki 8 bnai wa da lai. Da dep u wow phah lai sumaar cha baar ka jylla ya ini i kjut wa wa da tip kam i jait Interstitial Lung Disease tangwa ym em chait u.

Kamtæ da wan u cha NEIGRIHMS wei da pait ya oo da ki Doctor ka chnat Department of Tuberculosis and Respiratory Diseases, NEIGRIHMS wa yahkhmat da u Dr. Vijay Noel Nongpiur, Assistant Professor, u Dr. John Muchahary, Senior Resident wa u Dr. Gideon Thangkhiew, Junior Resident. Hadien wa da thooh bniah da chem wa da yoh u ya ka kjut wa tip kam kam ka Pulmonary Alveolar Proteinosis.

Kani ka kjut Pulmonary Alveolar Proteinosis toh kawa ktah yei riñ mynsien wei kiwa yoh ya ini i kjut toh uwi na 6.87 Million ngut ha pyrthai. Ini i kjut da pynmih ko ya ka i Surfactant Lipoprotein iwa man kam i jait snieh wa yada ya ki sner tangwa manda mih boon palat i da psiah ki chapoh ki sner iwa da pynthut yei ye u riñ mynsien wei lada ym sumaar daw yah ko leh chei yap.

Related posts

Sdang ka Woodland WK Hospital yei pynkha khon wa khlem kjut iwa nyngkong dooh hapoh ka West Jaiñtia Hills

March 22, 2025

Pynman ka Jowai City YMCA ya ka Health Camp neibynbta kiwa da heh rta

March 21, 2025

Yow sumaar ya kani ka kjut Pulmonary Alveolar Proteinosis da hap wow leh da ka jait sumaar wa tip kam ka Whole Lung Lavage, heiwa yei sner da pyndap da ka um Saline yow siat khooid ya ini i snieh wa kset ya i sner.

Yow pynkhooid ya ki sner uni u bru, ki Doctor da thap ki hadooh 7 litre i Saline yow siat khooid yei sner wei mar dep i sumaar, uni uwa chitom da sdang wot u wow suk u riñ mynsien we da ku leh ka Oxygen wa em hapoh i doh u wei da yoh u leh wow mih napoh Hospital.

Ki Doctor kiwa da leh ya ini toh kiwa na ka chnat Department of Tuberculosis and Respiratory Diseases, Anaesthesia wa CTVS OT.

Ka Dr. Priyanka Dev, Associate Professor waka Dr. Dasara Nongbet, Senior Resident wa kiwa na ka Department of Anaesthesiology da leh ki ya ka Anaesthesia wei yei pooid da leh da u Dr. Reuben Kynta, Associate Professor, Department of CTVS.

Ini jop wow e sumaar ya kani ka Pulmonary Alveolar Proteinosis da wai laad ko leh ya kiwi lada em kiwa yoh ya ini i kjut wow chait u khiah biang ki na kani ka kjut wym pu em jooh pyrchang u sumaar hapoh ka thaaiñ North East hi waroh kawi.