Ka Super Division Football League Tournament 2022 wa pynman da ka West Jaiñtia District Sports Association (WJDSA) kawa tip leh kam ka U Kiang Nangbah Memorial Trophy da pynman ya ka Semi Final wa ar ynne ka sngi.
Ka Nangbah Mulang da yachem ko waka Mynthong heiwa ka Nangbah da jop ko da 2-1.
Kamwa jia ynnin ha ka Semi Final wa nyngkong, ka kool wa pynjop dapoi ko ha ka Extra Time biang.
Ka Mynthong da yoh ko wow thap kool nyngkong ha ka minit wa 24 lyngba u Romaric B Nguefang kawa da neh hadooh wa kut ka kylla step. Ka Nangbah Mulang da su ko chi kool ha ka minit wa 52 lyngba u Promi Suting kawa da neh hadooh wa kut i por.
Kamtæ ka yalehke da poi ko cha ka Extra Time heiwa ha ka minit wa 101, u Pynishai Lathong da thap u ya ka kool wa pynjop ya ka Nangbah Mulang.
Ini mut i wa ka Nangbah Mulang hanla jop ko leh ym pu yoh ko wow psiah Final heiwa daw hap ko wow yachem waka 7Wasa ha ka 1 tarik u Naichiphaw yow rai ya kiwa yoh u psiah Final yow yachem waka Ladthadlaboh. Ka 7Wasa toh kawa da rem ha ka Ladthadlaboh haka Semi Final wa nyngkong.
Ha iwi won i liang, ki yakhun Quarter Final ka 40 Above Veteran Football Tournament daw pynman ha ka 26 tarik hapyrdi ka Catholic Youth waka Mawryngkneng heipor 1:00 waje i sngi wei daw pynbood da ka Mawlai Veteran waka Friend’s United heipor 3:00 waje.
