Ka Super Division Football League Tournament 2022 wa pynman da ka West Jaiñtia District Sports Association (WJDSA) kawa tip leh kam ka U Kiang Nangbah Memorial Trophy dapoi ko cha ka yalehke wa arphaw ynñiaw.
Ka yalehke wa da pynman ynne ka sngi toh hapyrdi ka Lumiawmuchai Shangpung waka Nangbahmulang kawa da kut da 1-1.
Ka Nangbah Mulang da yoh ko wow thap kool nyngkong ha ka minit wa 13 lyngba u Promi Suting heiwa ka Lumiawmuchai da su kylliang ko lyngba u Hawahoi Iakai ha ka minit wa 29.
Mynstep ka yalehke u man ko hapyrdi ka Sohmynting waka Ladthadlaboh heipor 2:45 i sngi wei u man ko leh ka yalehke wa khaddooh chwa wow sdang noh ya ki yakhun Semi Final.
