Ka Qualifier wa khaddooh ka Semi Final ka Super Division ka West Jaiñtia District Sports Association (WJDSA) yow jied ya ka liang wa psiah yakhun Final wa ka Khimusniang, da pynman ka ynne ka sngi hapyrdi ka Ladthadlaboh wa ka Demthring.
Kiwa yalehke ka Demthring da hiar madan ki deiwa kdohlang ha kti wa ki that rong yong kam ka dak pyrchah yei chah Suspend chi snem ki 6 ngut ki Player, u Coach, u Assistant Coach deilang wa u Manager ha ka WJDSA.
Ini waroh da sdang i ha ka yalehke Semi Final wa nyngkong hapyrdi ka Khimusniang wa ka Demthring kawa da pynman ha ka 5 tarik uni u bnai heiwa ka Demthring da rem ko da 2-1.
Ha kani ka yalehke, neiliang ka Demthring da ong ko wa da em iwi wa jia wa toh u e chut Penalty u Referee ya ka Demthring tangwa u Referee da kyntait u wow e neidaw wym em yoo biang wow e Penalty.
Kamtæ ha ini wa jia da em kiwa da hiar cha madan neiliang ka Demthring kiwa da pynkhor wei klam sih ya u Referee hadooh wa ka WJDSA da hap ko wow khut pulit yow wan cha madan yow yoh ki Referee tang wow psiah chapoh ka Dressing Room.
Hadien wa yoh ya ka Report na u Referee, neiliang ka WJDSA deiwa bood ya ki kyndon pynman yalehke da rai ko wow Suspend ya ki 6 ngut ki Player, u Coach, u Assistant Coach deilang wa u Manager.
Hadien ini, neiliang ka Demthring da phah kot ko cha ka WJDSA yow pyrkhat deiwa tangwa neidaw wa da bood katkam ki kyndon wa da booh wow pynchitom, da ong wym ye de u pynkylla yei rai.
Ha ka yalehke ynne, neidaw wa yieñ donhi kiwa yalehke ka Demthring khlem da bien u yaknieh bol, ka Ladthadlaboh da yoh ko wow thap hadooh 9 kool yow psiah Final.
Kiwa kyrchaan ya ka Demthring leh da wanrah ki ya ki lama rong yong deiwa beiñ yeiwa leh ka WJDSA deiwa ong wa leh ko khlem yurim wa biang.
Discussion about this post