Jowai : Ynne u DC ka West Jaiñtia Hills da lai li pait li sylli (routine inspection) u ya skur Barato Government LP School, Barato.
Heini lai sylli u da chem u wa ki khynnah kani ka skur ym em de u yoh ja ki hapoh ka Mid Day Meal Scheme nadooh u Kmaichonglad (December) 2015.
Hadien ini neidaw wym chimkhia kiwa pyllai skur u DC da rai u wow pyndam kreh chipor (Suspen) u ya ka head teacher kani ka skur hadooh wa pyndep ya i takit yeini (inquiry).
U DC ha ka post u ha ka Facebook da ong u wa lada ki khynnah ym em u e ja ya ki katkam ka kyndon Mid Day Meal Scheme tæ ileh ki bei ki pa, ki seiñbhalang, ki waheh chnong ym pyntip ki cha ki bor watoh u pait lyngba ka Whatsapp, Facebook, Message wa kiwi kiwi kiwa da e laad ya ki paidbah neiliang yong ka office u DC yow lait ki paidbah u pynlut por u wan cha ophis yong oo.
Discussion about this post