Ka seiñ FKJGP-Khliehriat Circle (FKJGP-KC) da pyntip ko wa da yoh ko chiboon ki ujor na ki paidbah wa da joor palat i sy’at dor ki dieñ kam ki pyrthap, ki dieñ chna yung wa kiwi kiwi ki jait dieñ hapoh ka thaaiñ Khliehriat.
Ka seiñ da ong ko wa nachwa ki dieñ chna yung ha ki thaaiñ Ladrymbai da poi ki du 180 hadooh 200 tangka chi kubit tangwa katni hadooh 700-800 tangka chi kubit wei ini da pynman ya ka seiñ wow thooh yei daw wa ku dor ki dieñ.
Wei hei chem ka seiñ deiwa tikna wa ki dieñ kiwa jooh pynemkaam wow chna yung chna sem da chalan tooh waroh chapoh Assam khlem ki kot ki sla wa biang, neitæ i kwah yong ki tre Saw Mill kiwa em hapoh Ri-loom Jaiñtia wow dai ya ki dieñ chapoh ka jylla Assam neidaw wa ye dor ki deiwa heh wei i dawa dieñ ha Assam leh man i iwa joor bha iwa da pynman ya ki dukan dai dieñ kiwa em hapoh ka jylla wow pynku dor neibhah i chalan tooh ya ki dieñ chapoh ka Assam man ko kawa joor bha hadooh kattæ kattæ.
Kamtæ da ong wa ini i pynbiang dieñ ya ka Assam da booh ko hei maa ya ki khloo ki kjam ka jylla Meghalaya wei ini daw pynman ko ya ka jylla Meghalaya wow thied dieñ kylla na kiwi ki jylla manda lut ki dieñ yong ka jylla iwa daw booh hei maa leh ya ki bru yong i khamtam kitu kiwa dooh wa duk wow ye u thied dieñ neibynta u chna yung chna sem.
Chooh chooh da ong wa kini kiwa chalan tooh ya ki dieñ hanla ym biang ki ya ki kot ki sla tangwa lait bait ki ha waroh ki Check Point yong ka chnat Forest kamjooh ki yong ki pulit neibhah wa da em chwa i ya sñiawthooh yumut.
Khaddooh ka seiñ da kyrpaad ko ya ka chnat Forest wow paitbniah wym toh u e laad u chalan tooh ya ki dieñ chapoh Assam wei da maham leh lada ka seiñ chem ko yeini neini chakhmat, daw kem wei e kti ya ki cha ki bor ka aiñ, pynkut ka wyrta na u President ka Seiñ FKJGP-KC, u Mishal Chyrmang.
