Syier mynsien ki Pnar ha Block-I wa mih thymme ka seiñ kieñ suloi ki Karbi

Ki paaid wa chong chnong yong ka Elaka Labang Nangphyllut Pangam Raliang ha Block-I da syier mynsien ki neidaw wa da mih thymme ka seiñ kieñ suloi yong ki Karbi kawa tip pyrtuid kam ka United Peoples Front of Karbi Longri (UPFKL), wei hajrong i mih thymme kani ka seiñ da tip lyngba ka khubor wa mih na Karbi wa mih haka 28 tarik u Naiynñiaw 2023, heiwa ar ngut ki dkhot kani ka seiñ da chah kem ki naka thaaiñ Manja Tini Ali ha ki pulit ka Karbi Anglong District wa ki CRPF wei kiwa chah kem toh kiwa da tip pyrtuid kam u Sanjay Engti wa u Rajesh Phangso kiwa naka chnong Jrikyndeng, West Karbi Anglong kawa dang haap hapoh Block-I hi.

Na kini da yoh leh wow kem ya ki kuli suloi 9mm soo tylli, kawi ka .22 Pistol wa u Magazine wa em 5 tylli ki kuli .22mm, 3 tylli ki HE 36 Hand Grenande wa 2 tylli ki Detonator wa da chem napoh ka kari Alto wa pynemkaam ki.

Katkam i khana u Chairman ka Hynniewtrep Border Dispute Redressal Forum, u Chandame Sungoh, ong u leh wa katkam ka khubor yong ki Karbi na kini wada chah kem da chem leh chiboon ki chithi dawa poisa hei pyrtuid kani ka seiñ. Tangwa wym em khana cha kiyi de ki pyrtuid bru wa da phah ya kini ki chithi dawa poisa, tangwa katkam ka yutip ha kini ki chithi ye u em leh u em ki pyrtuid yong ki Pnar wa em ha kani ka thaaiñ.

Da ong u leh wa kani ka seiñ wa dang seiñ thymme da em ko palat 500 ngut ki dkhot wei i thmu yong ki toh yow pyntieñ yaki Pnar yow tieñ ki u lai wa wan wei yow tieñ ki leh u klam næ dawa yei hok yong ki wow em bait chapoh Meghalaya, najrong wow pynchitom haki rukom waphær kamwa jia haki snem 2000 hadooh 2012, 2013.

Related posts

Da boonsien dep u yasyllok wa kiwa chongdai madan, phylla u Paul yei pynbaad wa leh yabor

November 24, 2024

Da 4 lak tam ki Vote jop ka Priyanka Gandhi ha ka Election wa nyngkong yong ka

November 23, 2024

“Neiliang ki paaid wa chong chnong yong ka Elaka Labang Nangphyllut wa ka Hynniewtrep Border Dispute Redressal Forum pyntip ko cha ki paradoh parasnaam yong ka Bri U Hynñiewtrep wa cha ki seiñbhalang waroh wa em hapoh ka Ri Khasi Jaiñtia wow man kiwa pynkhreh u e yarap lada jia iyi re iyi wa sih yaki paradoh parasnaam, wei wymtoh leh u yoobeiñ la jia wa chah thombor ki ha ki seiñ kieñ suloi,” ong u Chandame.

Neitæ kyntu haroh ki ya ki paaid Karbi wymtoh u chna ko da kani ka buit wa sih u wanrah i arwi awra wei ya mih snaam namo wanrah i sñiawphær jaitbru, neibhah wa ki paidbah wa chong chnong kwah ki yei chongsuk chongsaaiñ.

Tangwa lada ki Karbi won pteiñ ki wow kynroi ki ki paaid Pnar, dei wym yohsa u thoohlad wow yada ya idæ wei wow leh kylliang la jia wa sdang ki Karbi.

Kiwa chong chnong wa ka Forum smat ki wow yakrehlang waka sorkar neibynta i pynkhreh pynbait pood, wei  kwah ki leh wa ki ar sorkar u pynbait pood ki dei luti suk khnang wa ki paaid Pnar ka thaaiñ u yoh ki yei hok yong ki.

Kyntu haroh ko yaka sorkar Assam-Meghalaya wow chimkhia ki u thooh ya kini ki dkhot kani ka seiñ wei wow pyndooh jait ki, khnang u wan ka chongsuk chongsaaiñ.