Ha kini ki tayaaw wa dadep hadien wa wan u slap wa joor da sakhi leh yei oor ki sarok ha kylleiñ ki chnong heiwa yeiwa oor ki khyndaw wa ki moo ha sarok da smat wow kyrriah noh ya ki.
Ha kani ka kynti ki kattu katni ki bru paidbah da pyntip ki ya u Wyrta yei sy’ir mynsien ki wow lai luti na u sarok Jowai-Amlarem-Dawki (JAD) neidaw wa em i bynta u sarok ha Treiongriang iwa da oor.
“I oor u sarok na cheiliang ka Wah Myntdu da booh i hei maa ya kiwa lai wa wan neibhah da i oor da em i hakhmut sarok wei lada jia wa slap daw joor chooh i oor, wei kiwa ym jooh lai luti neini ye ki wow haap chapoh neibhah wym em kær (Barrier) ha ini i thaw,” da ong uwi na kiwa pyntip cha u Wyrta.
Hajrong ini neiliang u Executive Engineer ka PWD Central Division, u M. Tang da pyntip u wa daw phah u ya ki sahep na ka chnat wow lai pait ki yeini khnang wow leh yeiwa emkaam.
