Ki Home Guard Volunteer kiwa da kreh neibynta ka khlam COVID-19 ha ki snem wa dadep hapoh ka West Jaiñtia Hills District kiwa em kamwa palat chispah ngut, ynne ka sngi da lai ki cha ka yung krehkaam u Commandant ka Home Guard and Civil Defence da i thmu wow khang noh ya ka.
Ini i leh ki Home Guard Volunteer wow khang ya kani ka yung krehkaam toh wa hadooh katni ympu em u su ya ka nongsngi yong ki kawa dang sah sa kamwa 149 sngi ha i dor wa T. 550 chi sngi.
Ha ini i thmu da em i yaleh i yakhun hapyrdi kini ki Volunteer wa ki Home Guard wa kreh ha kani ka yung krehkaam kamjooh leh wa ki pulit wa da wanpoi ha ini i thaw.
Ki Volunteer da dap ki dei chrai hadien wa yachem wa u Commandant heiwa da ong ki wa i yaklam ym em u man kaam i wei ym yoh ki yei kular na uni u sahep ka chnat.
Ini i yaleh da neh i kattu katni por hadooh wa hap kah leh ya ka dwar da ka Generator wei ka yit yong ka dwar leh da piah ko.
Hadien kattu katni por da wan u Magistrate, u M. Challam wei da e u ha ki Volunteer ya ka chithi wa pynyoo wa ki bor District da thoh ki ya ka chithi hajrong ini i kaam kawa da thoh ha ka 1 tarik uni u bnai cha ka yung krehkaam u Executive Director ka SDMA.
Neiliang ki Volunteer da hun ki yeini wei da kyrmen ki wow yoh ya ka nong chwa ka Christmas deiwa maham wow pynjoor yei yakhih lada ymyoh ya kani ka poisa waroh chisien yoh.
