Ynnin ka sngi, ki khon khynroo khyllood ka chnong Iooksi Pyllun kiwa kynthup ya ka Iooksi Iapkhla, Iooksi Priang, Iooksi Umdeinlin, Iooksi Kyanmynsar wa Iooksi Tongkiad da lum da lang ki chi thaw ha Community Hall yong ka Iooksi Thlongmoo neibynta wow pyrkhat ya ki kaam wa yatoh wa i thmu yakhun Election u Nehemayah Tyngkan kam u kyrtong ka Congress na 4-Mowkaiaw Constituency.
Kamtæ da rai wow kyntu ya ki paidbah wow kyrchaan ya u Nehemayah wei ha kani ka sngi da e yarap da ka poisa yow kyrchaan yei yaleh Election u.
Neiliang uwi na ki khynroo ka chnong Iooksi, u Nangaibormi Sutnga da ong u wa u kylla ka synchaar hi toh du deiwa mih ki paidbah wa thap Vote kiwa sñiawthooh yei emkaam i synchaar wa khooid deiwa kiar chwa na idæ wow chah thied hei bor ka poisa.
Da ong u leh wa u Nehemayah toh uwa wan na ka manyung wa dooh wei ha kini ki por man ko iwa eh wow yakhun Election khlem ka poisa wei u kyrtong toh uwa thrang sakhiat wow chakri ya ki paidbah wei ha kini ki por ym em thaw ya kiwa dooh wa duk ha ka saiñhima sima.
Hawa e khublei ya ki khynroo ka chnong Iooksi Pyllun hajrong i e yarap, u Nehemayah da ong u wa lada waroh em ki ya ini i mynsien wa kamni, khlem pep daw yoh yei synchaar wa khooid khlem da leh chiliangkhmat wei lehbor.
Ha kani ka sngi ka poisa wa da e sñiawbha cha u Nehemayah da poi ko T. 14,070.
