Ka KSU Lapangap Unit ynnin ka sngi da lai yachem ko ya u Chief Forest Officer yong ka JHADC hajrong ki kpær slacha yong ka chnat Forest ka JHADC kawa da sdang wow pynkrehkaam nadooh u snem 2006-2014.
Ya ka slacha da thung da rep ha Moorangtung Khanduli ha i thaw wa heh kamwa 15 Hectare, ha Mookyntian Khanduli i thaw wa heh 5 Hectare katwa ha Riat Siatmuid Khanduli ha i thaw wa heh 12 Hectare; i lut waroh wa da pynkrehkaam ha kini thaw wa da kyrchaan poisa da ka sorkar pyrdi toh hadooh T. 2,69,07,309.
Ka seiñ da phylla ko wa manda lai thooh yutip neiyi i daw wym em pynkrehkaam hok ya kitai ki kpær slacha kamwa da thmu da ka JHADC yow myntoi ya ki paidbah Khanduli-Lapang kamjooh yow yoh kaam yoh jaam. U CFO da jubab u deiwa ong wa ya kitai ki thaw da ieh noh neidaw wa ka slacha kawa da thung ym toh da i symbe wa bha.
Ka seiñ da phylla ko wa kammon ka chnat Forest yong ka JHADC wym em thung ko da ki stat wow jied ya ki symbe wow thung ha kitai ki thaw. Kamtæ da pynyoo wa ka chnat Forest yong ka JHADC ym em ko yei thmu wow yarap næ wow e myntoi ya ki paidbah yong katai ka thaaiñ.
Kamtæ ka seiñ da ong ko wa ka JHADC toh kawa kwah du wow pynsepai ya ka poisa du neibynta wow yoh myntoi ki kattu katni ngut ki sahep.
Neiliang yong ka KSU Lapangap Unit da ong ko wa ym chong klikti ko wei daw booddien ko ya ini i kaam hadooh wa da chem yei sakhiat. Neidaw leh wa ini i thaw toh iwa em hajan khappood waka Assam kawa jooh kam ya ki thaaiñ. Lada ka JHADC ym ye ko wow pynkrehkaam ya kitai ki thaw, ka seiñ ka dawa ko wow pynuiñ biang ya kitai ki thaw cha ki chnong wa da e sñiawbha nadooh ki por wa nachwa.
