Kam chibynta wow kynmoo warom ya ki chipai kiwa da yakhun ha ka thma Kargil, u President ka ri, u Ram Nath Kovind ynnin da ekti u ya ka Cheque wa T. 20 lak cha ka Army Hospital (Research and Referral), Delhi, wow thied ya ki tiar neibynta ki Doctor wa ki wakreh ha i yakhun ya ka khlam u COVID-19.
Ynnin ka 26 tarik toh ka sngi Kargil Vijay Diwas namo ka lyngkhooh snem wa 21 nadooh wa jop ka India ya kani ka thma.
Ini i e yarap u President cha kani ka Army Hospital toh hadien wa yaleh ka Rashtrapati Bhavan wow pynduna yei lut poisa wei wow pynlang poisa neibynta wow yakhun ya kani ka khlam u COVID-19.
Chwa ini, u President da pynmih u ya ka hukum wow pynduna yei pynlut poisa ka Rashtrapati Bhavan wei kam chibynta yong ini, da phah pynsangeh chwa u wow thied ya ka kari Limousine ka wow pynemkaam ha ki por wa kongsan (Ceremonial Occasion).
Kani ka poisa wa e yarap u President cha ka Army Hospital daw pynemkaam wow tbied ya ki PAPR (Powered Air Purifying Respirator) wa kiwi kiwi ki tiar wow pynemkaam ki Doctor.
U President, kam u khlieh ki chipai ka ri (Supreme Commander of the Armed Forces), deini i leh yong oo, da yooluti wow ye u wow pynchlur chooh chooh ya kiwa em haphrang wow yakhun ya ka khlam COVID-19 ha ka Army Hospital.
