Jowai: Katkam ka RTI wa da leh da u Kynjaimon Amse uwa man leh kam u muktiar, da chem u wa u Secretary, Law Department of Meghalaya da ya soi soskular u wa ki tre yung wow pynman yaka kam ka yung krehkaam ka The District & Session Judge, Khliehriat. Wei katkam ka soskular ka bai yung man ko T. 80, 000 chi bnai wei ya ka bai bordiñ won u su leh da ka sorkar.
Yaka soskular da krehkaam ko nadooh u 01-05-2017 wei ya ka bai yung leh da su nadooh uni u bnai.
Katkam ka jubab wa da yoh naka RTI wa da booh ha u DC ka EJH, u Amse da ong u wa da khyrngiat u wow yoo ya ka bai yung wai kawa hadooh katni da toh u su T. 21,60,000 wei na kani da dep su ka sorkar T. 10,40,000 cha ki tre yung.
Nalor ini da dep su leh ya ka bai bordiñ cha ka MeECL kawa da poi T. 62, 610 wei waroh iwa toh u pynlut da poi ko T. 22,22,610.
U Amse da ong u wa i thmu wow chim wai ya kani ka yung toh wow pynemkaam kam ka yung bichaar ka District & Session Judge, Khliehriat. Tangwa hadooh katni ya kani ka yung ym em pynemkaam ka da ka sorkar wei ym em hi leh katæ ka District & Session Judge ha Khliehriat.
Da ong u leh wa ini da man ko wow pynsepai yaka poisa paidbah hadooh wa ki muktiar ka East Jaintia Hills District da chem chitom ki wa ym em u pynkhlaad noh yaka bichaar namo ka Judiciary naka Executive deiwa em ka District wa Session Court hapoh ka District.
Chooh chooh u Amse da ong u wa kani ka poisa wa da pynlut ka sorkar ye ko wow yarap ya kiwa boon ki man yung, kamjooh wow su yaka tulop kiwa sikai wei man ko leh ka kamram yong ka sorkar wow pyntikna wa ym sepai ka poisa paidbah.
Discussion about this post