Ka jylla Kerala da pynbna ko wow e yarap T. 3 lak kawa su chisien su cha ki khynnah wa dooh ya ka bei wa u pa ha u COVID-19 kamjooh wow kyrchaan yaki ha ka puræ puthi yong ki.
U Chief Minister ka Kerala u Pinarayi Vijayan da pynbna u wa daw e yarap leh T. 2000 chi bnai cha kini ki khynnah hadooh wa dap ki 18 snem najrong wa pynlut ya ka bai puræ puthi ki hadooh ka kyrdan Degree.
Kiwi ki jylla leh da em kiwa sdang ya ini kam ha Delhi heiwa u Chief Minister Arvind Kejriwal da ong u wa ya ka bai lutsan ha ka puræ puthi ki khynnah wa dooh ya ka bei wa u pa daw pait da ka sorkar wei daw pait leh yei heh i san yong ki.
Ka jylla Odisha waka Manipur leh da pynbna ki wow sumaar ya ki khynnah kiwa da man khonswet na ka khlam.
Ka Women & Child Development Minister ka Smrithi Irani da khana ko wa da em 577 ngut ki khynnah ha kylleiñ ka ri kiwa da dooh ya ka bei wa u pa na u COVID-19.
Ynne ka sngi, neiliang ka Supreme Court leh da pynmih hukum ko yow phah ya ki sorkar jylla wow sumaar ya ki khynnah kiwa da man khonswet na ka khlam COVID-19.
