Ki dkhot ka KSU Umsning Circle ynne i janmiet da yoh ki wow ksoh ya ki baar jylla wa thmu wow wan mylla cha ka jylla Meghalaya ha ki thaaiñ Ri-loom Jaiñtia khlem ki kot ki sla wa biang.
I yoh ksoh ka KSU Umsning Circle ya kitai ki baar jylla toh hadien wa yoo phær yei rukom wan yong ki hadooh 2 tylli ki Bus kiwa em ya u Number kari AS-01GC-7338 wa AS-01KC-5638 wei ya kitai ki baar jylla da ksoh noh ha ki thaaiñ Umsning wei hawa sylli ya ki da chem toh ki wym biang ki kot ki sla kiwa wa em palat 90 ngut.
Ka KSU da chem ko leh na kini ki bru wa ha ka Infiltration Checkgate, ym em pynrkhiñ kiwa kreh heiwa kini ki baar jylla da khana ki wa da su ki T. 4000 yow yoh u psiah laitlan wei dapoi ki chadooh Umsning.
Kitai ki baar jylla toh kiwa da thmu wow lai kreh mylla cha ki karkhana pynmih khyndaw-bilat wa em ha East Jaiñtia Hills District.
Ka seiñ da ong ko leh wa i wym bna ka sorkar wow pynkhor da pynman ya ki District wa marjan waka Assam wow joor ki kaam lute, i tooh, i khayi drug wei boon ki damok wa thmu wow pynyap ya kiwa lui-lui kiwa da sakhi ha kini ki sngi ki tayaw wa katni.
Ka KSU da ong ko wa man-i-por da jooh maham ko ya kiwa wanrah bru wow mylla chapoh ka jylla khlem ki kot ki sla wa biang neibhah toh ki wa pynchlur wow tyngkheiñ ya ka aiñ Inter-State Migrants Workmen (Regulations of Employment and Conditions of Service) Act 2011 kawa em ki kyndon wa pait yeini.
Hadien wa ki dkhot ka KSU Umsning Circle da takit ko ya kini, da wan wow chimkti noh da ki pulit ka Umsning kiwa da chimkhia wow lai pynuiñ ya ktiai ki baar jylla deiwa pyntikna wa uiñ biang ki cha Assam.
