U Montri ka chnat Bordiñ u James Sangma da ong u wa em i sñiawthooh bakla namo i wym tip bha ki paidbah iwa da wanrah yei pyrchah ya ka One Time Settlement Scheme (OTS) kawa da dep wow pyntikna da ka chnat Aiñ wa da leh ya ka katkam ka aiñ chwa wow pynkrehkaam ya ka wei ka sorkar kattu u lai ko katkam ka aiñ ya kitu ki wym em wan chakhmat wow chim ya kani ka Scheme kawa maap ya ka bai bordiñ.
Da kyntait u leh wa ka OTS man ko pyrchah ya ka aiñ, “Bakla ki, neibhah ym em iyi iyi wa man pyrchah ya ka aiñ deiwa pynkrehkaam ya ka OTS. Ki OTS Scheme toh kiwa da leh da kiwa boon ki jylla heiyatoh wa ka dan wei ini man ko ka kabu ya ki bru wow pynkhooid ya ka bai bordiñ wa sah ki wa ka sorkar da slem por”.
Neiliang ka liang pyrchah da kylli ko ya ka sorkar jylla yei pynkrehkaam ko ya ka OTS Scheme yow yoh biang ya ka poisa wa dang sah wa da dooh ki chiboon kam ka Value-added Tax (VAT).
Hawa yatoh wa ini, u James da ong u wa, “Kani ka Scheme toh kawa da dep bichaar bniah da ka chnat Aiñ. Ym sñiawthooh i wa iyi i daw wa boh ka liang pyrchah neibhah da leh yeiwa emkaam katkam ka aiñ chwa wow pynkrehkaam ya kani ka Scheme”.
Da pynche u leh wa hadien wa dam noh ka sorkar wow e ya ki ‘C Form’ cha kiwa boon ki Petrol Pump, da em kiwa dam u krehkaam katni neidaw wym em C Form ki kamtæ ym ye ki wow kit Petrol yow dai.
“Lada ym ye ki Petrol Pump wow su ya ka poisa wa dang sah, ym e ‘C Form’ de ya ki wei ini toh iwa da leh i heiyatoh wa ini,” da ong u.
Chooh chooh da ong u wa kini ki Scheme da wanrah yow e laad ya kitu kiwa dam u su dan deiwa booh ki kyndon hadooh katwon u maap wei kiwa su leh ye ki wow jied kammon u su.
Da pyntip u leh wa em 229 tylli ki Petrol Pump ha kylleiñ ka jylla, da ong uwa hadooh ka 31-03-21 ka dan wa da yoh na ki Petrol Pump neibynta u snem mang poisa 2018-2019 toh 445.77 klur, ha u 2019-20 T. 367.86 klur wa ha u 2020-2021 won T. 529.88 klur.
Da ong u wa na ki 229 tylli ki Petrol Pump, 58 tylli toh kiwa sah poisa wym pu em su dan nadooh T. 5000 hadooh kattu katni klur.
“Waroh ka poisa wa dang sah hadooh ka 01-04-20 toh T. 79.48 klur katwa kawa da yoh ha u 2020-21 toh 5.71 klur, kawa da kheiñ kam kawa da dooh wym yoh de toh T. 23.87 klur katwa kawa ym pu em yoh toh T. 49.90 klur,” da ong u.
