Ka Meghalaya Assembly Committee on Empowerment of Women (MACEW) da pyntip ko wa ka sorkar jylla daw e yarap ko T. 5 lak cha ka manyung yong ki ar ngut ki chi payu kiwa da suba chah tynyap pyn ha u pa hi ha ka ha 30 tarik u Naisan.
Ynne ka sngi, ka Committee on Empowerment of Women da khut ko ya u Director General of Police, u Dr. Lajja Ram Bishnoi, ya ka Chairperson yong ka Meghalaya State Women Commission (MSCW), ka Phidalia Toi wa ya ka Chairperson yong ka Meghalaya State Commission for Protection of Child Rights (MSCPCR), ka Ïamonlang M Syiem yow tip yei lai yong i kaam hawa yatoh wa ini i jia.
Ka Chairperson yong ka MACEW, ka Dr. M Ampareen Lyngdoh da khana ko wa ka Committee da yoh yutip ko wa ka chnat Social Welfare dang pynbiang ko ya iwa emkaam yow yarap cha kiwa ha yung yong kitai ki ar ngut ki khynnah, wei da pynsñiaw ko yei kyrmen wa ka chnat daw pyndep noh ko ya ini i thmu rap smat khnang wa kiwa ha yung leh u yoh ki wow e kti ha u muktiar wa biang yow yakhun hapoh ka yung bichaar.
Da ong ko wa ka Committee ka sñiawkhia ko ya ini i kaam heiwa da e yumut leh wa emkaam ya ka chnat pulit, ka MSWC wa ka MSCPCR wow ya phyllu yumut lang hawa yatoh wa ka ujor yong ka bei kitai ki khynnah hajrong i chah dat ha u kurim uwa da tynyap syndon ya ki khon.
