Ka Balang Catholic yong ka Jowai Diocese ynne ka sngi da ye ko u pynyieñ ya u paia neibynta u sdang noh i chna yaka yungmane Cathedral ha Moosalyngkat, Jowai kawa da mang hei lut wa T. 8 klur tam wei i por wow pyndep da booh hapoh 3 snem.
Ha kani ka sngi pynyieñ paia da wan emlang ki le ngut ki Montri ka sorkar jylla wa kynthup ya u Lahkmen Rymbui, u Kyrmen Shylla wa u Sñiawbhalang Dhar, nalor u MLA ka 2-Jowai u Wailadmiki Shylla, ki MDC wa kynthup ya u Andrew Shullai, u Robinus Syngkon, kiwa yahkhmat ka Balang Catholic nadooh u Most Rev. Victor Lyngdoh (Jowai Bishop & Archbishop of Shillong) ki phadar, ki Sister wa kiwi.
U Sñiawbhalang Dhar, hawa e yei klam haka yalang wa tbian, da pynsñiaw u yei kmen wow yoh u emlang ha kani ka sngi wei da kyntu haroh u yaka Construction Committee kamjooh ki khon ka Balang wow man ki kwa yatylli, neibhah wa manda yieñ ka Cathedral ha kani ka thaw, daw man i i burom yong ka Balang, i burom yaka chnong Jowai wa ka District hi waroh kawi.
Da pynrap haroh u wa i ya krehlang man-i i bor wei ym em leh iwon iwon i wym ye u jop chisien wada em i ya krehlang.
Heijooh i por kular u wow e yarap kamwa T. 50 lak neibynta u chna ya kani ka Cathedral, wei kyntu kyrsu haroh u ya kiwi won wow chimbynta yarap ki katwa joh i bor neibynta i burom yong waroh lang, khamtam yaka Jowai Diocese.
Neiliang u Lahkmen Rymbui ong u, da tip wa i pynlut toh kawa heh, tangwa lada waroh u em i mynsien yarap kat i bor wa ye, i lut ym man de iwa khia, nalor wa emkaam ya ki bor wa toh u pait wow pynlai hei rukom wa toh wa tne.
Yooluti haroh u wa kani ka Cathedral u wanrah ko yei man kawi haka Balang, ha ki jait niam waphær waphær, wei i man kawi haka jaitbru hi waroh kawi neibynta i burom u bru wa u Blai.
Nalor ki klam, i duwai kyrkhu kyrdoh wada chimbynta lang daki MLA, MDC kiwa yahkhmat ka Balang Catholic da yoh leh i chaad naki khon khynroo khyllood ka Balang.
