Ka karkhana wa chna yei dawai yada COVID-19 hapoh India, ka Bharat Biotech ynne ka 24 tarik da pyntip paidbah ko wa ya i dawai yada COVID-19 wa pynmih ko iwa tip kam i Covaxin daw dai cha ki sorkar jylla hei dor T. 600 chisien e (Per Dose) katwa ha ki thaw sumaar ki bru samen namo ki Private Hospital won T. 1200 chisien e.
Kani ka karkhana da ong ko wa hadien wa hukum ka sorkar pyrdi wow e noh yei dawai cha waroh kiwa em 18 snem chaneiñ, da pynthymme noh ko ya i dor yong ini i dawai heiwa ka Serum Institute if India (SII) leh da pynbna ko yei dor i dawai tika yong ka i Covishield.
Ka Bharat Biotech da rai ko leh wa i dor chalan (Export) ya i Covaxin u man i $15-20.
Da ong ko leh wa palat 50% na i dawai Covaxin wa pynmih ko toh neibynta ka sorkar pyrdi heiwa da dai ya ki heidor T. 150 chisien e (Per Dose) cha ka sorkar pyrdi iwa da e mynkna won da ka sorkar cha ki paidbah katkam wa da yakut nyngkong iwa neibynta i 100 Million sien heiwa manda kut ini, daw ye u dai leh cha ka sorkar pyrdi heidor T. 400 chisien e.
Ka Bharat Biotech da ong ko wa i dawai yong ka toh iwa bha iwa ye u yada na kiwa boon ki kjut yow lait u poi Hospital wei man i leh iwa krehkaam 78% pyrchah ya u COVID-19 wa 100% ya kiwi ki kjut. Kamtæ da pynksan yei hap wow pynkudor neidaw wa syad u chna wei pynmih ya ini i dawai.
Puræ leh: Pynbna ka SII yei bai dawai yada COVID-19 wa T. 400 neibynta ki sorkar jylla
