Hei yachem wa u Symbood Montri Rangbah ka jylla, u Prestone Tynsong wow yaklam hajrong ka yakhih “Save Hynñiewtrep Mission” neiliang yong u President ka EJNC, u Sambormi Lyngdoh da pynsñiaw u leh ya ki kattu katni ki phang kiwa ki paidbah da tyngkhooh ki yei eh kam i sih palat yong u sarok National Highway nadooh East Jaiñtia Hills District chadooh Puriang, Mawryngkneng ter-ter.
Hawa yaklam wa kiwa yahkhmat yong ki 5 tylli ki seiñ, neiliang u Prestone da khana u wa ka NHAI da dep phah ko ya ka Detail Project Report (DPR) yong uni u sarok cha ka sorkar pyrdi wei ka sorkar pyrdi daw pynlait ko hadooh T. 70 klur neibynta wow siang rong ya u sarok National Highway nadooh na Puriang chadooh East Jaiñtia Hills District.
Chooh chooh neiliang uwa yahkhmat yong ka EJNC da pynsñiaw u leh yei sñiawkhia hawa yatoh wa i sahteiñ wa i chna ya ka Iawmusiang Shopping Complex kawa da sahteiñ kawa da sdang nadooh u 2006. Wei da pynkynmoo leh ya u Symbood Montri Rangbah wa u Montri Rangbah, u Conrad K Sangma ha u 2020 da yachem u wa ka JHADC deilang ya ka chnat PWD (Building) wei da kular u wow pynlait poisa noh neibynta wow pyndep ya kani ka yaaw tangwa hadooh katni dang man iwa sahteiñ.
Hawa yatoh wa ini, neiliang u Prestone da kular u wow chimkhia wei wow booddien ya ini i kaam.
