Ki pulit ka East Jaiñtia Hills ynne ka sngi da sdang pynkrehkaam ki da ka E-Chlallan namo wow daiñ kuna ya kiwa tyngkheiñ ya ki kyndon yah kari namo ki Traffic Violations deiwa pynemkaam da ki kor POS.
Kini ki kor wa em kamwa 10 tylli da poi ki ha ka District ha ka tayaaw wa dadep wei da sdang pynemkaam ya ki ynne ka sngi ha Lad Rymbai wa Khliehriat ki thaw wa em ki Traffic Cell.
Ki bru wa chah daiñ kuna ye ki wow su da ka poisa næ da ki Debit Card næ Net Banking.
I daw wa sdang pynkrehkaam ya ki E-Challan toh wow wanrah yei khooid ha i rukom daiñ kuna yow lait ka poisa u wiar wei yow biang yukheiñ wei ynne da daiñ kuna lada ym em pyndait Seat Belt næ khlem Helmet kiwa man ki kyndon hapoh ka Section 177 MV Act wei ka kuna man ko T. 1000 wei mar su ya kani ka kuna ka poisa da lai bait ko cha ka sorkar wei lada ymye wow su heitu i por daw chim ya ki dur ki kot (Digital/Photocopy) wei da e por wow su ya ka hapoh chi bnai. Ya kani ka poisa ye won u su manda poi ha yung da ka Net Banking wei ym emkaam u lai cha thanat.
Chooh chooh mar thap ya ki Number ka kari ha kini ki kor, daw mih leh ki yutip wa yatoh wa u tre, lada dang krehkaam ka Insurance, ye u pynsakhiat ya ka Number kari wa ki tre, wa kiwi ki yutip khamtam lada ka kari man ko kawa da chah tooh.
Du ynne ka sngi hadooh T. 7,000 daiñ kuna ki pulit ka East Jaiñtia lyngba ki E-Challan.
Kamtæ da kyrpaad ya ki paidbah waroh wow bood ki ya ki kyndon yah kari wa thuk-thuk kamjooh.
