Ki pulit ka Economic Offences Wing (EOW) hawa lai kynreh yei yung yong uwi wa kreh sorkar ka Madhya Pradesh, da yoh ki wow kem ya ka poisa kawa T. 85 lak wa ki kot ki sla wa yatoh wa ki thaw ki bhaw u kiwa da chongdor da ki klur.
Uni u bru toh uwa tip kam u Hero Keswani wei da kreh u ha ka chnat Medical Education Department kam u Upper Divisional Clerk wei ka tulop u man ko T. 50,000 chi bnai.
Ka EOW da pteiñ ko wow kynreh yei yung u Keswani hadien wa mih u na Hospital ynnin ka sngi neidaw wa uni u bru hadien wa yoo u ya ki bru ka EOW da pyrchang u wow pynkut yei mynsien deiwa dih dei dawai sait yung.
Kamtæ ka EOW da hap ko wow sangeh chwa yei kynreh katwa uni u bru dang chah sumaar u ha Hamidia Hospital wa em ha Bhopal wei da pteiñ biang yei kynreh yei yung u hadien wa mih u na Hospital.
I kynreh iwa da pteiñ hadooh ynnin i miet da wanrah lang wa ka kor yow niaw poisa yow ye u kheiñ hadooh katwon em ka poisa ha yung u.
Ha ini i kynreh da chem wa ka poisa kamjooh ki thaw u da man ki 300 chah ya ka poisa wa yoh u naka tulop katkam wa pyntip ka EOW.
I yung u Keswani toh iwa em ha Bhopal wei da sdang wow tip chaphang yong oo hadien wa sdang u wow thied thaw thied yung ha ini i thaw.
U Superintendent of Police (EOW), u Rajesh Mishra da khana u wa nyngkong uni u bru da pyrchang u wow khanglaad ya ki pulit wow kynreh yei yung u wei ki yung ki sem wa ki thaw u da chongdor ki T. 4 klur.
Da antaad wa i yung u Keswani wa em boon ki tiar wa syad dor da chongdor i T. 1.5 klur.
Katkam wa pyntip u Superintendent of Police, uni u bru da sdang u wow kreh deiwa yoh ya ka tulop kawa T. 4000 chi bnai tangwa katni da yoh u kamwa T. 50,000.
Kiwa ha yung u Keswani leh toh kiwa em da ki lak tangka ha ki Bank Account ki.
U Keswani da thied u ya kiwa boon kini ki thaw hei pyrtuid ka kurim kawa ym em khih em khan.
Ya u Hero Keswani toh uwa da boodien chwa da ka EOW hadien wa mih i chah pynbaad yei rukom pynlai poisa da ka Jeev Seva Sansthaan Charitable Trust ha Bhopal.
