U Banteidor Lyngdoh, Agriculture Minister ynne ka sngi da saam u da ki kor loor lyngkha (Power Tillers) wa ki symbe cha ki warep ka jylla hapoh ka Sub Mission on Agricultural Mechanization (SMAM) kawa hapoh ka State Plan Scheme 2020-2021 haka yalang wa pynman daka Agriculture Engineering (Mechanical) Wing ka chnat Agriculture and Farmers’ Welfare, ka sorkar Meghalaya, ha Meghalaya State Agricultural Management and Extension Training Institute, 7th Mile, Upper Shillong.
Deiwa booh thong wow pynchlur yei pynemkaam da ki kor hawa rep yow pynboon yeiwa ye u pynmih, hapoh kani ka Scheme da yarap posia T. 90,000 cha ki warep yow thied ki ya ki Power Tiller katwa yaka poisa wa sah yow thied hap ki wow pyndap na ki.
Hawa e yei klam, u Banteidor Lyngdoh da ong u wa ka khlam COVID-19 da booh ko hei eh yaka chnat wow ye ko u leh ya ki kaam wa da pynkit haka. Hanla kattæ leh, deiwa kreh chitom ki sahep wa ki wakreh da ye ki wow kynjoh ya ki warep.
Da khana u leh wa katni i dawa wow pynemkaam da ki kor da joor ko wei ka chnat ym ye de ko wow pyndap ya ini iwa emkaam ki warep, tangwa da yaleh wow pyntikna wa waroh yoh yarap ki lyngba ki Scheme ka sorkar pyrdi wa ki yong ka sorkar jylla.
U Montri da ban joor u leh yei emkaam wow pynman ya ki pynsñiawthooh paidbah hajrong ki Scheme sorkar waphær waphær neibynta ki warep yow ye ki u chim kabu, yow ye u pynku yaka kaam rep hapoh ka jylla. Da kdaw u leh yei emkaam wow pynkylla ya ki kyndon pynkrehkaam ka Pradhan Mantri Krishi Sinchayee Yojana (PMKSY) yow yahap ko wa iwa rukom man cha i deiwa pyntip leh wa daw saam 700 tylli ki Power Tillers cha ki warep ka jylla hapoh uni u snem.
