Jowai: Hadien wa u Chief Executive Member ka JHADC u Thombor Shiwat da wanrah u yaka Resolution wow e bor wow booh khyrdop khrong dan noh yaki Dolloi haki Elaka waphær waphær, ki MDC ka liang pyrchang da yieñ ki wow pyrchah joor ya kani ka Resolution khamtam ki MDC ka BJP wa kynthup ya u Lakhon Biam, u Dawan Lyngdoh wa u Krison Langstang, deiwa ong ini toh i wanrah yei eh ya ki paidbah khamtam ki kup chiliang u sem chiliang wa kreh na kti ha ktien, neibhah wa daw hap ki wow tyngkhooh yaki dan ha man ki Elaka.
Hajrong kani ka Resolution u Lakhon Biam da ong u wa hei yong sakhiat ka Executive Committee toh u thooh ko da kiwi ki laad ki luti wow wanrah yaka yarong poisa yong ka Council, deiwa e nongmuna yaki phaw tylli ki karkhana hapoh Ri-loom Jaiñtia nadooh ki karkhana pynmih khyndaw bilat, ki Coke Factory wa kiwi.
“Ki karkhana ki kamai ki da ki phaw phaw klur lyngba ki mar pohkhyndew haka chisngi, ka poisa lai ko cha baar, lada bichaar bha ka Council, em ko boon ki laad ki luti, hanla em leh i chitom poisa, ym emkaam wow wanrah da kani ka Resolution, pynrehkaam yaki khydrop wa da booh ha ki Cement Plan, pynkrehkaam yaki dan wa ki heh spah nalor kiwi ki laad ki luti ym toh wow pynchitom yaki paidbah wa kup chiliang sem chiliang,” ong u Lakhon Biam.
Kani ka Resolution da pynkynmoo u haki ya i por wa synchaar ki phareng nachwa kiwa boon ki dan kiwa da wanrah haka jaitbru wei da ong u wa lada mynjur yaka, i yaam bru daw sdang ko nadooh katni ka sngi wei u pteiñ katwa dang lai kani ka Resolution.
Neiliang u Andrew Shullai, MDC ka Congress uwa man leh uwa yahkhmat ka liang pyrchah, da ong u, ini i kaam ym toh wow e bor yaki Dolloi tangwa wow pynemkaam yaki Dolloi neibynta wow yoh kamai, da pynkynmoo u leh wa nachwa da em kam ini i jooh hadooh wa da wanrah yei chah Suspend ki Dolloi neidaw wa booh ki da ki khyrdop khrong dan ki wym yahap wa i dustur. Da ong u wa katkam ka dustur i rukom khrong dan ki Dolloi nachwa, ym toh ha sarok tangwa haki yaw ki haat, ki hali pator. Nalor wa kdaw leh yaki bynta wa e bor yaki Dolloi tangwa da ksoh bor noh ka Council.
Chooh chooh da ong u wa ka dan yong ki mar pohkhyndaw da yoh bhah chwa lyngba ka Royalty wa su ki bru cha ka sorkar, kamtæ kani ka Resolution ye ko wow yah bakla neini chakhmat wei boon ki wow chim kabu wei tieñ leh wa yoh nadooh ki khian ki nai leh daw toh dan ki.
Hadien wa klam u Andrew Shullai wa kattu katni ki MDC ka liang pyrchah, u Lakhon Biam deiwa sñiaw chrai wym sñiawhun yei pynkrehkaam yaka Resolution, da yieñ biang wow klam deiwa chrai.
“Kat nang puræ nang pait nang ap ya iwa klam ki para dkhot, nga sñiaw O wa toh u taar ya kani ka Resolution. Taar ya kani ka Resolution thap hapoh muna wei manda poi ha yung yow noh cha thaw noh jhep itæ toh i kwah yong i, wei ha ini i por ym emkaam wow mynjur ya kam kani ka Resolution,” ya kini ki ktien da klam da u Lakhon Biam katwa dang taar yaka Resolution.
Neiliang u Richard Lyngdoh, hawa yieñ da ong u wow pyrshah leh kammon wei wow mynjur leh kammon tangwa emkaam wow pyrkhat boi ya em i eh hadien, wei tieñ leh ya hiar dor kam kiwa mihkhmat, neibhah nachwa hawa pynsangeh da leh hajrong ka yurim.
U Krison Langstang wa u Dawan Lyngdoh leh da pynsñiaw ki yei pyrchah joor deiwa ong wa i leh toh yaki khian ki nai katwa yaki heh won da pyllait, ha i sakhiat ka EC toh u lai chwa ko cha ki karkhana pynmih khyndaw-bilat, pynyoo ya i bor ym toh wow tieñ, rah yaki kot ki sla ki aiñ ka JHADC wym toh u kohngooh yaki heh tangwa pynyap won yaki khian ki ria.
Hadien ini, neiliang u CEM da ong u wa ya ini da leh katkam i hok riti dustur hi wa ki Dolloi toh u yoh ki. Hajrong ini, kiwi won ki MDC kiwa kyrchaan da yieñ ki wow e yei kyrchaan ya kani ka Resolution wei chwa u Chairman ka dorbar u Dr. Sankey Shangpung u e u yei mynjur ya kani ka Resolution, ki le ngut ki MDC ka BJP da mih noh ki napoh ka dorbar.
